కార్వీ సంస్థ ఎండీ పార్థసారథిని హైదరాబాద్‌ సీసీఎస్ పోలీసులు అరెస్టు చేశారు. బ్యాంకులను మోసం చేసిన కేసులో పార్థసారథిని నాంపల్లి న్యాయస్థానంలో హాజరుపరిచారు. ఇండస్ ఇండ్ బ్యాంకు నుంచి రూ. 137 కోట్లు రుణం తీసుకున్న పార్థసారథి.. ఆ మొత్తాన్ని తిరిగి చెల్లించలేదు. దీంతో సదరు బ్యాంకు ప్రతినిధులు రెండు నెలల క్రితం సీసీఎస్‌లో ఫిర్యాదు చేశారు. కేసు నమోదు చేసి దర్యాప్తు చేపట్టిన పోలీసులు పార్థసారథిని అరెస్టు చేశారు.
కార్వీ సంస్థ తన పెట్టుబడిదారుల షేర్లను సొంత ఖాతాకు బదిలీ చేసుకుని సొంత షేర్లుగా చెప్పుకుని బ్యాంకుల నుంచి భారీ మొత్తంలో లోన్లు తీసుకుంది. సెబీ నిబంధనలకు విరుద్ధంగా ఇన్వెస్టర్ల షేర్లను వినియోగించుకుంది. నిజమేనని నమ్మిన బ్యాంకులు దాదాపు రూ. 137 కోట్ల రుణాలు ఇచ్చాయి. అప్పు తీర్చకపోవడంతో ఆయా బ్యాంకుల ఫిర్యాదు మేరకు దర్యాప్తు చేశాం-అవినాశ్‌ మహంతి, జాయింట్‌ సీపీ