DK ARUNA on TRS:తెలంగాణ మంత్రి శ్రీనివాస్ గౌడ్పై హత్యకు కుట్ర పన్నారంటూ సైబరాబాద్ పోలీసులు మహబూబ్నగర్ యువకులపై తప్పుడు కేసులు బనాయించారని భాజపా జాతీయ ఉపాధ్యక్షురాలు డీకే అరుణ ఆరోపించారు. ఈ కేసు వెనుక రాజకీయ, ప్రభుత్వ కుట్ర దాగి ఉందని ఆమె ధ్వజమెత్తారు. కొంతమంది పోలీసులు అత్యుత్సాహం ప్రదర్శిస్తున్నారని.. ఎన్నికల్లో మంత్రి శ్రీనివాస్ గౌడ్ తప్పుడు అఫిడవిట్ సమర్పించాడని కొందరు వ్యక్తులు ఎన్నికల కమిషన్కు ఫిర్యాదు చేశారన్నారు. సామాజిక మాధ్యమాలు వేదికగా.. మంత్రి అవినీతి, కబ్జాలపై ప్రశ్నిస్తున్న వారిని వేధిస్తున్నారని మండిపడ్డారు. ఇది తట్టుకోలేక మంత్రి వారిపై కక్షగట్టి కిడ్నాప్‌ కూడా చేయించినట్టు తెలిపారు. మహబూబ్నగర్ ప్రజలకు వాస్తవాలు తెలుసునన్నారు.
మంత్రి శ్రీనివాస్ గౌడ్ హత్యకు కుట్రపై సీబీఐ విచారణ జరిగాల్సిందేనని డీకే అరుణ డిమాండ్ చేశారు. గత నెల 23 నుంచి మహబూబ్ నగర్ జిల్లాలో అనేక పరిణామాలు చోటు చేసుకుంటున్నాయని అన్నారు. ఎన్నికల వేళ తన అఫిడవిట్ను ట్యాంపర్‌ చేశారని గత నెల మంత్రి శ్రీనివాస్‌గౌడ్‌పై రాఘవేందర్‌రావు పిటిషన్ వేశారని తెలిపారు. గత నెల 23న రాఘవేందర్‌రావు తమ్ముడు నాగరాజును కిడ్నాప్‌ చేశారని వెల్లడించారు. మంత్రికి వ్యతిరేకంగా పనిచేస్తున్నాడని యాదయ్యపై కక్ష పెంచుకున్నారని ఆరోపించారు. గత నెల 24న యాదయ్యను కూడా కిడ్నాప్‌ చేశారని తెలిపారు.
సైబారాబాద్ సీపీ కథ చదివారు
ఉమ్మడి ఆంధ్రప్రదేశ్లో పులిలా రెచ్చిపోయిన సైబరాబాద్ కమిషనర్ స్టీఫెన్ రవీంద్ర ఒక కొత్త కోణాన్ని బయటకు తీశారని ఆరోపించారు. ఆయన చెప్పిన ప్రతి లైన్, కథ, స్క్రీన్ ప్లే తుగ్లక్ రోడ్డు నుంచి వచ్చాయని స్పష్టంగా అర్థమవుతోందని మండిపడ్డారు. సీపీ స్టీఫెన్ రవీంద్ర మీడియా సమావేశం చూసి ప్రజలు నవ్వుకుంటున్నారన్నారని ఎద్దేవా చేశారు. ఈ కుట్రలో మొదటి ముద్దాయిగా కేసీఆర్, రెండో ముద్దాయిగా మంత్రి శ్రీనివాస్ గౌడ్ చేర్చాలని ఆమె డిమాండ్ చేశారు.
తెరమీదకు కొత్త వివాదం
మంత్రి శ్రీనివాస్ గౌడ్పై హత్యకు కుట్ర అనే కొత్త వివాదాన్ని తెరమీదకు తెచ్చారని డీకే అరుణ విమర్శించారు. పోలీసులకు ఫోన్లు చేస్తే ఏ ఒక్కరూ కూడా స్పందించలేదని ఆమె ఆరోపించారు. మహబూబ్ నగర్ డీఎస్పీకి కాల్ చేస్తే మాకు ఎలాంటి ఇన్ఫర్మేషన్ లేదు అన్నారు. ఎస్పీకి కాల్ చేస్తే ఆయన స్పందించలేదని... సీవీ ఆనంద్, మహేష్ భగవత్, స్టీఫెన్ రవీంద్రకు ఫోన్ చేసినా ఎవరూ ఏమీ తెలియదన్నారని తెలిపారు.