అమరావతిని రక్షిస్తే.. అది రాష్ట్రాన్ని రక్షిస్తుంది:సుజనా

ప్రభుత్వం చేస్తున్న 3 రాజధానుల ప్రతిపాదనను అమలు చేసేందుకు 4 లక్షల కోట్ల రూపాయలు అవసరమని భాజపా ఎంపీ సుజనా చౌదరి చెప్పారు. రాజధాని ప్రాంతంలో భూసమీకరణ, రైతులతో ఒప్పందాలు, అక్కడి అభివృద్ధి, నిర్మాణ పనుల పురోగతి, రాజధాని మార్పు వల్ల కలిగే నష్టాలు వంటి అంశాలతో ఆయన ముఖ్యమంత్రి జగన్​కు 10 పేజీల లేఖ రాశారు.

అమరావతిలోనే రాజధానిని కొనసాగేలే చూసేందుకు ఎందాకైనా పోరాడతామని భాజపా ఎంపీ సుజనా చౌదరి తెలిపారు. అన్ని అంశాలను పరిగణనలోకి తీసుకున్నాకే రాజధానిగా అమరావతిని గతంలో ఎంపిక చేశారని గుర్తు చేశారు. ప్రస్తుతం అమరావతిలో 52 వేల 837 కోట్ల రూపాయల అంచనా వ్యయంతో 62 ప్రాజెక్టులు మొదలయ్యాయని తెలిపారు. వీటిలో 42 వేల 170 కోట్ల పనులకు టెండర్లు కూడా ఖరారైనట్లు వివరించారు. అయితే వైకాపా అధికారంలోకి వచ్చాక నిర్మాణ పనులు నిలిపివేశారని... ఇందుకు తోడు సీఎం అసెంబ్లీలో మూడు రాజధానుల ప్రతిపాదన చేయటం ఆశ్చర్యం కలిగించిందనీ చెప్పారు. ఇప్పటికిప్పుడు రాజధానిని మార్చటం అంటే న్యాయపరమైన చిక్కులు, ఆర్థిక అవస్థల్ని కొని తెచ్చుకోవటమేనని అన్నారు. ఈ విషయాలపై.. ముఖ్యమంత్రికి సుజనా చౌదరి లేఖను పంపారు.

తాను ఇన్ సైడర్ ట్రేడింగ్ ద్వారా గత ప్రభుత్వం నుంచి లబ్ధి పొందినట్లు మంత్రులు చేస్తున్న విమర్శలను సుజనా తప్పుబట్టారు. రాజధాని కోసం భూసమీకరణ చేసిన దాంట్లో... వైకాపా నేతలు అక్రమాలు జరిగినట్లు చెబుతున్న 4వేల 75 ఎకరాలు.. కేవలం 12 శాతం మాత్రమేనని వివరించారు. అక్రమాలు జరిగాయని భావిస్తే పూర్తిస్థాయి విచారణ జరిపించాలని డిమాండ్ చేశారు. ‍ఒకవేళ ప్రస్తుత చట్టాల ప్రకారం శిక్షించటం సాధ్యం కాకపోతే దిశ మాదిరిగా కొత్త చట్టం తీసుకురావాలని సూచించారు.

ప్రస్తుతం అమరావతి నిర్మాణానికి ప్రభుత్వం వద్ద డబ్బు లేకపోయినా పర్వాలేదని.... అనుకూల వాతావరణం కల్పిస్తే పెట్టుబడిదారులు వస్తారని తెలిపారు. ప్రజాప్రయోజనాలు దృష్టిలో ఉంచుకుని నిర్ణయాలు తీసుకోవాలని సూచించారు. రైతులు, పెట్టుబడిదారులు గత ప్రభుత్వంతో ఒప్పందం కుదుర్చుకున్నారు కాబట్టి... వాటిని నెరవేర్చకపోతే వారు కోర్టుకు వెళ్లే అవకాశం ఉందన్నారు. 2013 భూసేకరణ పునరావాస చట్టం ప్రకారం పరిహారం ఇవ్వాలంటే 33 వేల 771 ఎకరాలకు కలిపి లక్షా 89 వేల 117 కోట్ల పరిహారం అవుతుందని వివరించారు. మూడు రాజధానుల నిర్ణయం తీసుకుంటే... అది రాజ్యాంగబద్ధ ఒప్పందాలను ఉల్లంఘించటమేనని లేఖలో అభిప్రాయపడ్డారు. వృక్షో రక్షతి రక్షితః అన్న తరహాలో అమరావతిని మనం రక్షిస్తే... అదే అమరావతి రాష్ట్రాన్ని కాపాడుతుందని హితవు పలికారు.

ఇదీ చదవండి: