'ఇప్పుడు భాజపాకు బలం లేకపోవచ్చు... ప్రజలకు చేరువవుతాం...'

రాష్ట్రంలో భాజపా సొంతంగా ఎదిగి అధికారంలోకి వస్తుందని ఆ పార్టీ నేతలు జీవీఎల్​ నరసింహారావు, సునీల్​ దేవధర్​ జోస్యం చెప్పారు. యూపీలో మాదిరిగానే ఓ బలమైన శక్తిగా ఎదుగుతామని అన్నారు. ఏపీలో ప్రాంతీయ పార్టీలు.. కుటుంబ పార్టీలుగా మారాయని ఎద్దేవా చేశారు. తెదేపా అధినేత చంద్రబాబు సైకిల్​ తొక్కలేక రాజకీయ సంక్షోభంలో చిక్కుకున్నారని జీవీఎల్​ విమర్శించారు.

ఆంధ్రప్రదేశ్​లో భాజపా ఓ శక్తిగా ఎదుగుతుందని ఆ పార్టీ నేతలు జీవీఎల్​, సునీల్​ దేవధర్​ ఆశాభావం వ్యక్తం చేశారు. రానున్న రోజుల్లో ఏపీ రాజకీయాలు ఉత్తరప్రదేశ్​ తరహాలోకి మారనున్నాయని జోస్యం చెప్పారు. ప్రస్తుతం పార్టీకి రాష్ట్రంలో బలం లేకపోయినా.. కచ్చితంగా ప్రజలకు దగ్గరవుతామని.. సొంతంగా ఎదిగి అధికారంలోకి వస్తామని అన్నారు. ఏపీ భాజపా నూతన అధ్యక్షుడు సోమువీర్రాజును నేతలు ఘనంగా సన్మానించారు.

సోము వీర్రాజు నేతృత్వంలో బంగారు ఆంధ్రప్రదేశ్​ కోసం పార్టీ పోరాటం సాగిస్తుందని రాష్ట్ర భాజపా ఇంఛార్జీ సునీల్​ దేవధర్​ అన్నారు. మాజీ అధ్యక్షుడు కన్నా లక్ష్మీనారాయణ సైతం పార్టీకి సమర్థంగా సేవలందించారని అన్నారు. భాజపా, జనసేన నేతృత్వంలో రాష్ట్రంలో పార్టీ బలోపేతానికి కృషి చేస్తామని దేవధర్​ స్పష్టం చేశారు.

చంద్రబాబు తప్పుకున్నారు

యూపీలో ములాయం సింగ్​ యాదవ్​ మాదిరిగానే.. తెదేపా అధినేత చంద్రబాబు సైతం సైకిల్​ తొక్కలేక రాజకీయాల నుంచి తప్పుకున్నారని భాజపా ఎంపీ జీవీఎల్​ నరసింహారావు ఎద్దేవా చేశారు. చంద్రబాబు కుమారుడికి రాహుల్​ గాంధీ మాదిరిగా పార్టీ నడిపించే సామర్థ్యం లేదని అన్నారు. లోకేశ్​ యువ నాయకత్వాన్ని ఆకట్టుకోలేరని చెప్పారు. 40 ఏళ్ల అనుభవం ఉన్న సోము వీర్రాజు నాయకత్వంలో ఏపీలో భాజపా మరింత ముందుకు వెళ్తుందని ఆశిస్తున్నట్లు పార్టీ ఎంపీ జీవీఎల్​ నరసింహారావు చెప్పారు. కరోనా సమయంలో వీర్రాజు ఎంతో నిబద్ధతతో పని చేశారని ప్రశంసించారు. రాష్ట్రంలో ప్రాంతీయ పార్టీలు కుటుంబ పార్టీలుగా మారాయని ఆయన విమర్శించారు.

ఇదీ చూడండి..