మూడు రాజధానులకు మద్దతుగా దీక్షలకు వెళ్తున్న వారిని అడ్డుకున్న కేసులో అరెస్టయిన అమరావతి రైతులు పెట్టుకున్న బెయిల్ పిటిషన్ను గుంటూరు జిల్లా కోర్టు కొట్టి వేసింది. మంగళగిరి మండలం కృష్ణాయపాలెంకు చెందిన రైతులు ఈ కేసులో అరెస్టయి ప్రస్తుతం గుంటూరు జిల్లా జైలులో రిమాండ్ ఖైదీలుగా ఉన్నారు. వారు పెట్టుకున్న బెయిల్ పిటిషన్పై గుంటూరు జిల్లా కోర్టు గురువారం విచారించింది. బెయిల్ ఇవ్వడం సరికాదని ప్రభుత్వ తరఫు న్యాయవాది అభ్యంతరం వ్యక్తం చేశారు. ఫిర్యాదుదారుడి వాంగ్మూలం మంగళగిరి కోర్టులో నమోదు చేయాల్సి ఉందన్నారు. దీనివల్ల బెయిల్ పిటిషన్ను కోర్టు కొట్టేసింది.
ఫిర్యాదుదారుడు రవి రెండు రకాల ప్రకటనలు చేయటం వల్లే ఈ సమస్య వచ్చిందని కృష్ణాయపాలెం రైతులు చెబుతున్నారు. మంగళగిరి కోర్టులో ఫిర్యాదుదారుడు వాంగ్మూలం ఇచ్చాక... జిల్లా కోర్టులో మరోసారి బెయిల్ పిటిషన్ దాఖలు చేస్తామని చెప్పారు. అప్పుడు కూడా న్యాయం జరగకపోతే హైకోర్టును ఆశ్రయిస్తామని రైతులు తెలిపారు.