‘యాంటీ బాడీలు తయారయ్యే క్రమంలో అజాగ్రత్త వల్ల కరోనా వైరస్‌ సోకితే... టీకా పొందినా ఉపయోగం ఉండద’ని తెలంగాణ వైద్యశాఖ తెలిపింది. రెండో డోసు తీసుకున్న 14 రోజుల తర్వాత లబ్ధిదారులకు వైరస్‌ సోకినా.. దాని ప్రభావం తీవ్రంగా ఉండదు. కానీ వీరి ద్వారా ఇతరులకు వ్యాపించే ప్రమాదం ఉంది. అందుకే టీకా పొందిన వారు కూడా.. తప్పనిసరిగా మాస్కు, చేతుల శుభ్రత వంటి జాగ్రత్తలన్నీ పాటించాలని వైద్యశాఖ సూచించింది.
100 శాతం యాంటీబాడీలు వృద్ధి చెందేదిలా..
తొలి డోసు..
* టీకా తొలి డోసు శరీరంలోకి ప్రవేశించగానే శరీరం ప్రతిస్పందిస్తుంది. వెలుపలి నుంచి వచ్చే కొత్త వైరస్‌ను గుర్తించి, ఎదురుదాడికి సిద్ధపడుతుంది.
* ఈ క్రమంలోనే వైరస్‌కు వ్యతిరేకంగా యాంటీబాడీలు ఉత్పత్తి అవుతాయి.
* తొలి మూణ్నాలుగు రోజుల్లో శరీర కణాల్లో మార్పులు చోటుచేసుకుంటాయి. కొందరిలో జ్వరం, దద్దుర్లు, నొప్పి, తల తిరగడం వంటి స్వల్ప ప్రతిస్పందనలు సహజమే.