ఫిబ్రవరిలో స్థానిక సంస్థల ఎన్నికలు జరపాలన్న రాష్ట్ర ఎన్నికల సంఘం నిర్ణయాన్ని ఏపీఎన్జీవో అసోసియేషన్ తీవ్రంగా వ్యతిరేకించింది. కరోనా వ్యాప్తి అధికంగా ఉన్న ప్రస్తుత పరిస్థితుల్లో ఎస్ఈసీ ప్రభుత్వ ఉద్యోగులతో చెలగాటం ఆడుతోందని సంఘ నేతలు ధ్వజమెత్తారు. విజయవాడలో జరిగిన ఎన్జీవో సంఘం వెబ్ సైట్ ఆవిష్కరణ కార్యక్రమంలో అసోసియేషన్ నేతలు మాట్లాడుతూ.... రోజుకూ వేల సంఖ్యలో కేసులు వస్తున్నప్పుడు ఎన్నికలు పెట్టాలనడం దుర్మార్గమన్నారు.
కరోనాతో ఇప్పటితే చాలా మంది ఉద్యోగులు ప్రాణాలు కోల్పోయారని, ఎన్నికలు నిర్వహిస్తే మరింత మంది ఉద్యోగులు ప్రాణాలు కోల్పోయే ప్రమాదముందని సంఘం ప్రధాన కార్యదర్శి బండి శ్రీనివాసరావు ఆందోళన వ్యక్తం చేశారు. మీ స్వార్థం కోసం మా ప్రాణాలను బలి చేయవద్దని ఎన్నికల సంఘాన్ని కోరుతున్నట్లు తెలిపారు. ఇప్పట్లో ఎన్నికలు వద్దని ఎన్నికల సంఘానికి లేఖ రాస్తామన్నారు. ఎన్నికల వల్ల కరోనా బారిన పడి ఉద్యోగులు ఎవరైనా చనిపోతే ఎస్ఈసీ బాధ్యత వహించాలని డిమాండ్ చేశారు. ఎన్నికల నిర్వహణ ఆపాలని తాము కోర్టుకు కూడావెళ్తామని స్పష్టం చేశారు. రాష్ట్రంలో కరోనా తగ్గాకే ఎన్నికలు పెట్టాలని డిమాండ్ చేశారు.