తెలుగు రాష్ట్రాల పరస్పర ఫిర్యాదులు, అభ్యంతరాల నేపథ్యంలో నదీజలాల వివాదాలపై అత్యున్నత మండలి సమావేశమైంది. దిల్లీలో కేంద్ర జల్‌శక్తి మంత్రి గజేంద్ర సింగ్‌ షెకావత్ నేతృత్వంలో భేటీ అయిన ఈ సమావేశానికి... హైదరాబాద్‌ నుంచి ముఖ్యమంత్రి కేసీఆర్... దిల్లీ నుంచి ఏపీ సీఎం జగన్ వీడియోకాన్ఫరెన్స్‌ ద్వారా పాల్గొన్నారు. దృశ్యమాధ్యమం ద్వారా కృష్ణా, గోదావరి నదీ యాజమాన్య బోర్డుల ఛైర్మన్లు హాజరయ్యారు.
ప్రధానంగా నాలుగు అంశాలు..
నాలుగు అంశాలను అపెక్స్ కౌన్సిల్ అజెండాగా నిర్ణయించగా... ఏడు అంశాలను చేర్చాలని కేసీఆర్ కోరారు. పరస్పర ఫిర్యాదులు, అభ్యంతరాలపైనా చర్చించారు. బ్రిజేష్‌ కుమార్‌ ట్రైబ్యునల్ ప్రాజెక్టుల వారీగా కేటాయింపులు చేయకుండా పరిధిని నోటిఫై చేయాల్సిన అవసరం లేదని తెలంగాణ పేర్కొనగా.. నోటిఫై చేయాలని ఆంధ్రప్రదేశ్ కోరింది. నాగార్జునసాగర్‌తో పాటు శ్రీశైలం ప్రాజెక్టు నిర్వహణనూ తమకే అప్పగించాలని తెలంగాణ ప్రభుత్వం డిమాండ్‌ చేయగా... రెండు ప్రాజెక్టుల నిర్వహణను పూర్తిగా బోర్డుకే అప్పగించాలని ఏపీ కోరింది.
కృష్ణా బోర్డు ఏపీకి!
పోతిరెడ్డిపాడు విస్తరణ, రాయలసీమ ఎత్తిపోతలపై కేసీఆర్ అభ్యంతరాన్ని తెలిపారు. దీనిపై స్పందించిన జగన్.. వీటికి ఆయకట్టే లేదని... కేటాయింపులను సరిగా వాడుకునేందుకే పనులు చేపట్టామని వెల్లడించారు. గోదావరి జలాల పంపిణీకి, ట్రైబ్యునల్ ఏర్పాటుకు రెండు రాష్ట్రాలు తమ అంగీకారాన్ని తెలిపాయి. కృష్ణా బోర్డు కార్యాలయాన్ని ఏపీకి తరలించాలన్న అంశంలో... తెలంగాణ నుంచి ఎటువంటి అభ్యంతరాలు వ్యక్తం కాలేదు.