AP SSC Results: రాష్ట్రంలో పదో తరగతి పరీక్ష ఫలితాలు రేపు మధ్యాహ్నం 12 గంటలకు విడుదల కానున్నాయి. విజయవాడలోని ఓ ప్రైవేటు హోటల్‌లో ఈ ఫలితాలను రాష్ట్ర విద్యాశాఖ మంత్రి బొత్స సత్యనారాయణ ప్రకటించనున్నారు. నిజానికి శనివారం ఉదయం 11 గంటలకు టెన్త్ ఫలితాలు విడుదల చేయాల్సి ఉంది. కానీ.. అనివార్య కారణాల వల్ల ఫలితాల విడుదల సోమవారానికి వాయిదా వేస్తున్నట్లు ఆఖరి నిమిషంలో అధికారులు ప్రకటించారు. దీంతో.. రాష్ట్ర ప్రభుత్వం తీవ్ర విమర్శలను ఎదుర్కొంది. ఈ నేపథ్యంలో.. అధికారులు పకడ్బందీ ఏర్పాట్లు చేస్తున్నారు. రేపు మధ్యాహ్నం 12 గంటల తర్వాత www.results.bse.ap.gov.in అధికారిక వెబ్‌సైట్‌ నుంచి విద్యార్థులు ఫలితాలను చూసుకోవచ్చని అధికారులు వెల్లడించారు.
వాయిదాకు అదే కారణమా?: శనివారం ఉదయం 11 గంటలకు పదో తరగతి ఫలితాలను విజయవాడలో పాఠశాల విద్య ప్రత్యేక ప్రధాన కార్యదర్శి బి.రాజశేఖర్‌ విడుదల చేస్తారంటూ రెండు రోజుల ముందే విద్యాశాఖ ప్రకటించింది. ఆ సమయానికి పరీక్షలు రాసిన ఆరు లక్షల 20 వేల మందికిపైగా విద్యార్ధులు, వారి కుటుంబ సభ్యులు అంతా ఎంతో ఉత్కంఠగా ఎదురుచూశారు. మీడియా ప్రతినిధులు ఫలితాల కోసం విజయవాడలోని ఆర్అండ్బీ కార్యాలయానికి వెళ్లినప్పటికీ.. ప్రభుత్వం ముందుగా చెప్పిన సమయానికి సంబంధిత అధికారులు ఎవరూ ఆ ప్రాంతానికి రాలేదు. 20 నిమిషాల తర్వాత ఫలితాల విడుదలను అనివార్య కారణాల వల్ల సోమవారానికి వాయిదా వేశామనే సందేశాన్ని పంపించారు.