'పరస్పరం సహకరించుకోవాలి'... ఎస్​ఈసీ, సర్కార్​కు గవర్నర్​ సూచన

10:20 January 27

ప్రశాంతంగా ఎన్నికలు జరిపాలని ఆదేశం

పంచాయతీ ఎన్నికల ఏర్పాట్లు, తీసుకుంటున్న చర్యలపైచర్చించేందుకు గవర్నర్ బిశ్వభూషన్ హరిచందన్​ను రాష్ట్ర ఎన్నికల కమిషనర్(ఎస్​ఈసీ) నిమ్మగడ్డ రమేశ్ కుమార్, సీఎస్ ఆదిత్యనాథ్ దాస్ విడివిడిగా కలిశారు. ఉదయం 10.15 గంటలకు రాజ్​భవన్​లో గవర్నర్​ను ఎస్ఈసీ రమేశ్ కుమార్ కలిశారు. పంచాయతీ ఎన్నికల నిర్వహణకు తీసుకుంటున్న చర్యలను గవర్నర్​కు నిమ్మగడ్డ వివరించారు. పలువురు ఐఏఎస్​లు, ఉద్యోగులపై క్రమశిక్షణ చర్యలు తీసుకుంటున్న విషయాన్ని వివరించారు. అలాగే ఎన్నికలకు పూర్తిస్థాయి సహకారం అందించేలా ప్రభుత్వాన్ని, ఉద్యోగులను ఆదేశించాలని గవర్నర్​ను ఎస్ఈసీ కోరినట్లు తెలిసింది. వీటితో పాటు వ్యాక్సినేషన్ ప్రక్రియ కొనసాగింపునకు తీసుకుంటున్న చర్యలపై చర్చించారు. ప్రభుత్వంతో సమన్వయం చేసుకుని సామరస్య పూర్వకంగా ముందుకు వెళ్లాలని నిమ్మగడ్డకు గవర్నర్​ సూచించినట్లు తెలిసింది. 45 నిమిషాల పాటు వీరి సమావేశం జరిగింది.

ఎస్​ఈసీ వెళ్లిపోయాక గవర్నర్​ను సీఎస్ ఆదిత్యనాథ్ దాస్ కలిశారు. పంచాయతీ ఎన్నికల నిర్వహణకు ప్రభుత్వ పరంగా   తీసుకుంటున్న చర్యలను గవర్నర్​కు ఆయన వివరించారు. ఎస్​ఈసీతో సామరస్య పూర్వకంగా వ్యవహరిస్తూ ప్రశాంతంగా ఎన్నికలు జరిపేలా చర్యలు తీసుకోవాలని సీఎస్​ను గవర్నర్ ఆదేశించినట్లు తెలిసింది. ప్రభుత్వం, ఎస్‍ఈసీ మధ్య అంతరం తగ్గించుకుని... ఇద్దరూ పరస్పరం సహకరించుకోవాలని గవర్నర్ బిశ్వభూషణ్ హితవు పలికినట్లు సమాచారం.

ఇదీ చదవండి: