రాష్ట్రంలో పోలీసు అధికారులను నియంత్రించలేని స్థితిలో డీజీపీ ఉన్నారా? అని హైకోర్టు ప్రశ్నించింది. నియంత్రించే సమర్థత లేకపోతే డీజీపీ రాజీనామా చేయాలని ఘాటుగా వ్యాఖ్యానించింది. చట్ట నిబంధనల ఉల్లంఘనలు జరగకుండా చూసుకుంటామని గతంలో కోర్టుకు హాజరై డీజీపీ ఇచ్చిన హామీ ఏమైందని నిలదీసింది. ఆ హామీ ప్రకారం చర్యలు తీసుకున్నట్లు కనిపించడం లేదని అసంతృప్తి వ్యక్తం చేసింది. ఎవరినైనా ఎత్తుకెళ్లిపోవడం ఏపీ పోలీసులకు అలవాటుగా మారిందని అసహనం వ్యక్తం చేసింది. పోలీసుల తీరు ఇలాగే ఉంటే రాష్ట్ర ప్రభుత్వం ఇబ్బందుల్లో పడటం ఖాయమని హెచ్చరించింది. సక్రమంగా మసులుకునేలా సర్కారుకు సూచించాలని ప్రభుత్వ న్యాయవాదికి స్పష్టం చేసింది. పోలీసుల తీరుపై ప్రతి కేసును సీబీఐ, మెజిస్ట్రేట్ విచారణకు ఆదేశించలేమని పేర్కొంది. ఇప్పటికే మూడు విషయాల్లో మెజిస్ట్రేట్ విచారణకు ఆదేశిస్తే.. వాటన్నింటిలోనూ పోలీసులు నేరస్థులని తేలిందని వెల్లడించింది. రాష్ట్రంలో ప్రాథమిక హక్కులున్నాయా అంటూ మండిపడింది. ఓ వ్యక్తిని అక్రమంగా నిర్బంధించారంటూ దాఖలైన వ్యాజ్యంలో పోలీసుల తీరుపై హైకోర్టు ఈ వ్యాఖ్యలు చేసింది. వ్యాజ్యవిచారణను మంగళవారానికి వాయిదా వేస్తూ హైకోర్టు న్యాయమూర్తులు జస్టిస్‌ రాకేశ్‌కుమార్‌, జస్టిస్‌ జె.ఉమాదేవితో కూడిన ధర్మాసనం సోమవారం ఆదేశాలు జారీ చేసింది.
తప్పుడు కేసులు పెడతామని బెదిరించారు
తూర్పుగోదావరి జిల్లా ఇందుపల్లి గ్రామానికి చెందిన తన మేనమామ పి.వెంకటరాజును అమలాపురం పట్టణ ఠాణా పోలీసులు అక్రమంగా నిర్బంధించారని, ఆయన్ను కోర్టులో హాజరుపరిచేలా ఆదేశించాలని కోరుతూ సుంకర నారాయణస్వామి హైకోర్టులో హెబియస్‌ కార్పస్‌ పిటిషన్‌ వేశారు. ఆయన తరఫున న్యాయవాది శశాంక భువనగిరి వాదనలు వినిపిస్తూ.. ‘అమలాపురం పట్టణ పోలీసులు పిటిషనర్ తండ్రి వెంకట గంగాకృష్ణకు ఈ నెల 4న ఫోన్‌ చేసి స్టేషన్‌కు రావాలన్నారు. పిటిషనర్, ఆయన తండ్రి స్టేషన్‌కు వెళ్లారు. తన భార్య కనిపించడం లేదని, పిటిషనర్ తమ్ముడితో వెళ్లిందంటూ విశాఖ జిల్లాలో ఓ వ్యక్తి ఫిర్యాదు చేశారని అమలాపురం సీఐ ఎస్‌కే బాజీలాల్‌ వారికి చెప్పారు. పిటిషనర్ సోదరుడు ఎక్కడున్నాడని ఆరా తీశారు. దీని గురించి తమకేమీ తెలియదని వారు చెబుతున్నా వినకుండా సీఐ దుర్భాషలాడారు. తప్పుడు కేసులు పెడతామని బెదిరించారు. ఖాళీ కాగితాలపై సంతకాలు తీసుకున్నారు. దీనిపై పిటిషనర్ ఈ నెల 7న జిల్లా ఎస్పీకి ఫిర్యాదు చేశారు. ఇదే వ్యవహారంలో పిటిషనర్ మేనమామ వెంకటరాజును 6వ తేదీ రాత్రి అమలాపురం పట్టణ పోలీసులు తీసుకెళ్లారు. అరెస్ట్‌ చూపకుండానే ఆయన్ను విశాఖపట్నానికి పంపారు. రాజకీయ ప్రభావంతో సీఐ అధికార దుర్వినియోగానికి పాల్పడ్డారు’ అని వివరించారు.