'చిన్నారుల విక్రయాలపై పూర్తి వివరాలతో కౌంటర్​ దాఖలు చేయండి'

High Court on Child Trafficking: చిన్నారులను విక్రయించి సొమ్ము చేసుకుంటున్న తీరుపై పత్రికల్లో వచ్చిన కథనాలను పరిగణనలోకి తీసుకొని సుమోటో ప్రజాహిత వ్యాజ్యాలుగా నమోదు చేసిన హైకోర్టు.. తాజాగా వాటిపై విచారణ జరిపింది. పూర్తి వివరాలతో కౌంటర్లు దాఖలు చేయాలని కేంద్ర, రాష్ట్ర ప్రభుత్వ అధికారులకు నోటీసులు ఇచ్చింది.

AP HIgh Court News: గుంటూరు జిల్లా మంగళగిరిలోని గండాలయపేటకు చెందిన మెడబలిమి మనోజ్ తన మూడు నెలల చిన్న కుమార్తెను రూ. 70 వేలకు తెలంగాణ రాష్ట్రంలోని నల్గొండ జిల్లా కొండప్రోలు గ్రామానికి చెందిన గాయత్రికి విక్రయించారు. తర్వాత ఆ చిన్నారి ఆరుగురి చేతులు మారాక చివరిగా పశ్చిమ గోదావరి జిల్లా ఏలూరుకు చెందిన రమేశ్.. ఆ శిశువును రెండున్నర లక్షలకు కొనుగోలు చేశారు. చిన్నారి తల్లి ఫిర్యాదుతో అసలు విషయం బయటపడిన వ్యవహారంపై పత్రికల్లో మార్చి 30న వచ్చిన కథనాలను పరిగణనలోకి తీసుకొని హైకోర్టు న్యాయమూర్తులు జస్టిస్ అసనుద్దీన్ అమానుల్లా, జస్టిస్ జె.రామకృష్ణ ప్రసాద్‌తో కూడిన ధర్మాసనం పిల్​గా మలచాలని హైకోర్టు రిజిస్ట్రీని ఆదేశించింది. ఈ వ్యవహారాన్ని మానవ అక్రమ రవాణాగా పరిగణించాలని పేర్కొంది.

అంగన్వాడీ టీచర్ కూపీ లాగడంతో: పశ్చిమగోదావరి జిల్లా చింతలపూడి మండలం అల్లిపల్లికి చెందిన చిలకమ్మ అనే మహిళ తెలంగాణ రాష్ట్రంలోని భద్రాద్రి కొత్తగూడెం జిల్లా అశ్వారావుపేటలోని ఓ ప్రైవేటు ఆసుపత్రిలో మగ శిశువుకు జన్మనిచ్చారు. ఆమెకు తెలియకుండా భర్త, అత్త.. ఆ శిశువును విక్రయించారు. అంగన్వాడీ టీచర్ కూపీ లాగడంతో బిడ్డను విక్రయించిన విషయం వెలుగులోకి వచ్చింది. పోలీసులు కేసు నమోదు చేసి పలువురిపై కేసు నమోదు చేశారు. ఈ వ్యవహారంపై పత్రికల్లో కథనాలు వచ్చాయి. వాటిపై హైకోర్టు న్యాయమూర్తులు జస్టిస్ కొంగర విజయలక్ష్మి , జస్టిస్ గన్నమనేని రామకృష్ణ ప్రసాద్, జస్టిస్ వడ్డిబోయిన సుజాతతో కూడిన జునైనల్ జస్టిస్ కమిటీ స్పందించింది. సుమోటో పిల్‌గా మలచాలని హైకోర్టు రిజిస్ట్రీని ఆదేశించింది.

సుమోటోగా నమోదు చేసిన రెండు ప్రజాహిత వ్యాజ్యాలపై హైకోర్టు విచారణ జరిపింది. పత్రిక కథనాలను పరిగణనలోకి తీసుకొని మానవ అక్రమ రవాణా, ముఖ్యంగా చిన్న పిల్లల విక్రయంగా హైకోర్టు పరిగణించింది. పూర్తి వివరాలతో కౌంటర్లు వేయాలని ప్రతివాదులను ఆదేశించింది. కేంద్ర హోం శాఖ కార్యదర్శి, మహిళ, శిశు సంక్షేమ మంత్రిత్వ శాఖ కార్యదర్శి, జాతీయ దర్యాప్తు సంస్థ డైరెక్టర్, సీబీఐ డైరెక్టర్, ఏపీ ప్రభుత్వ ప్రధాన కార్యదర్శి, రాష్ట్ర డీజీపీకి నోటీసులు జారీచేసింది. దీనిపై విచారణను ఈనెల 2 కు వాయిదా వేసింది. హైకోర్టు ప్రధాన న్యాయమూర్తి జస్టిస్ ప్రశాంత్ కుమార్ మిశ్రా, జస్టిస్ ఎం.సత్యనారాయణమూర్తితో కూడిన ధర్మాసనం ఈ మేరకు ఉత్తర్వులిచ్చింది.

ఇదీ చదవండి:Baby at roadside: "నేనేం పాపం చేశానమ్మ... నన్నేందుకు ఇక్కడ వదిలేశారు"