రాష్ట్రంలోకి వచ్చేవారికి సడలింపు... ఆటోమేటిక్ ఈ-పాస్తో ఎంట్రీ
10:15 August 01
ఆటోమేటిక్ ఈ-పాస్ జారీకి ప్రభుత్వం నిర్ణయం
కేంద్రం జారీ చేసిన మార్గదర్శకాలకు అనుగుణంగా ఏపీలోకి రాకపోకలను సులభతరం చేసినట్టు కొవిడ్ టాస్క్ ఫోర్స్ ప్రత్యేక అధికారి ఎం.టీ. కృష్ణబాబు తెలిపారు. ఏపీలోకి వచ్చే వారంతా స్పందన వెబ్సైట్లో తమ పేర్లు నమోదు చేసుకోవాల్సిందేనని ఆయన స్పష్టం చేశారు. పేర్ల నమోదు ఆధారంగా ఆటోమేటిక్ ఈ-పాస్ జారీ అవుతుందని తెలిపారు. కేంద్ర హోం శాఖ జారీ చేసిన అన్ లాక్ 3 మార్గదర్శకాల ప్రకారం రాష్ట్రాల మధ్య రాకపోకలు ఇంకా సులభతరం అయ్యాయని స్పష్టం చేశారు.
ఇక నుంచి ఏపీకి వచ్చే వారికి స్పందన వెబ్ సైట్ ద్వారా ఆటోమేటిక్ ఈ- పాస్ లు జారీ అవుతాయని తెలిపారు. పేరు నమోదు చేస్తే మొబైల్, ఈమెయిల్లకు వెంటనే ఈ-పాస్ వస్తుందని చెప్పారు. చెక్పోస్టుల వద్ద ఏదైనా గుర్తింపు పత్రంతోపాటు ఈ పాస్ చూపిస్తే రాష్ట్రంలోకి అనుమతిస్తారని స్పష్టంచేశారు. రాష్ట్రానికి వచ్చే వారిని, వారి ఆరోగ్య పరిస్థితిని గుర్తించేందుకు.. తదుపరి ఆరా తీసేందుకు మాత్రమే స్పందనలో పేర్లు నమోదు చేసుకోవాల్సి ఉంటుందని ప్రభుత్వం స్పష్టం చేసింది. ఈ వివరాల ఆధారంగా క్షేత్రస్థాయిలో ఆరోగ్య సిబ్బంది తనిఖీలు చేసేందుకు ఆస్కారం ఉంటుందని తెలిపింది. అయితే ఈ వెసులుబాటు ఆగస్టు 2వ తేదీ నుంచి అమల్లోకి వస్తుందని తెలిపారు.
ఇదీ చదవండి: సీఆర్డీఏ భవితవ్యం ఏమిటో?