అమరావతి పరిరక్షణ కోసం శనివారం గుంటూరులో మహా పాదయాత్ర చేపడుతున్నామని.. అమరావతి పరిరక్షణ నేత గద్దె తిరుపతిరావు చెప్పారు. ఉద్యమాన్ని ఉద్ధృతం చేసేందుకు ఈనెల 12 నుంచి 17 వరకు వివిధ నిరసన కార్యక్రమాలు చేపడుతున్నామని తెలిపారు. ఈ నిరసనలకు ప్రజలందరూ మద్దతు తెలపాలని కోరారు.
ఈ నెల 17తో రాజధాని రైతుల ఉద్యమానికి ఏడాది పూర్తి కానుంది. ఏడాది సందర్భంగా అమరావతి రాజకీయేతర ఐకాస కార్యాచరణ ప్రణాళిక రూపొందించింది. రేపట్నుంచి 6 రోజులపాటు వివిధ రూపాల్లో రైతులు నిరసనలు తెలపనున్నారు. రేపు మధ్యాహ్నం 3 నుంచి 5 వరకు గుంటూరులో మహా పాదయాత్ర చేపట్టనున్నారు. ఈ నెల 14న తుళ్లూరులో కిసాన్ సమ్మేళనం నిర్వహణ, 15న విజయవాడలో రాజధాని పరిరక్షణ పాదయాత్ర, 17న ఉద్ధండరాయునిపాలెంలో బహిరంగ సభ నిర్వహించనున్నారు. అమరావతిని రాజధానిగా ప్రకటించే వరకు ఉద్యమం ఆగదని ఐకాస నేతలు డిమాండ్ చేశారు.