Teacher Rape On Student: విద్యాబుద్ధులు చెప్పాల్సిన గురువే బుద్దిహీనంగా ప్రవర్తించాడు. విద్యార్థుల భవిష్యత్తుకు బంగారు బాటలు వేయాల్సిన ఉపాధ్యాయుడు కామంతో రగిలిపోయాడు. అభం శుభం తెలియని 10వ తరగతి బాలికపై కన్నేశాడు. తన కోరిక తీర్చకపోతే పరీక్షల్లో ఫెయిల్ చేస్తానని బెదిరించి.. బాలికపై పలుమార్లు లైంగిక దాడికి పాల్పడ్డాడు. దీంతో ఆ చిట్టి తల్లి గర్భం దాల్చింది. ఈ ఘటన తెలంగాణలోని భద్రాద్రి కొత్తగూడెం, దమ్మపేట మండలంలో వెలుగు చూసింది. ఓ గిరిజన బాలికల ఆశ్రమ ఉన్నత పాఠశాలలో ఓ బాలిక 10వ తరగతి చదువుతుంది. అదే పాఠశాలలో పనిచేస్తున్న ఉపాధ్యాయుడు పిచ్చయ్య విద్యార్థినిపై కన్నేశాడు. తన కోరిక తీర్చకపోతే పరీక్షల్లో ఫెయిల్ చేస్తానని ఆ బాలికను బెదిరించి పలుమార్లు లైంగిక దాడికి పాల్పడ్డాడు. ఈ క్రమంలో విద్యార్థిని అనారోగ్యానికి గురి కావడంతో తల్లిదండ్రులు ఆమెను ఆసుపత్రికి తీసుకెళ్లారు.
బాలికకు వైద్యపరీక్షలు చేయడంతో గర్భవతి అని నిర్ధారణ అయింది. దీంతో తల్లిందండ్రులు ఆ బాలికను నిలదీయగా.. జరిగిన ఘోరాన్ని వారికి చెప్పింది. దీంతో విద్యార్థిని తల్లిదండ్రులు దమ్మపేట పోలీస్స్టేషన్లో ఫిర్యాదు చేశారు. ఉపాధ్యాయుడిపై పోక్సో చట్టం కింద కేసు నమోదు చేసి దర్యాప్తు ప్రారంభించారు. బాలికను గర్బవతిని చేసిన కీచక గురువును వెంటనే విధుల నుంచి తొలగించి , శిక్షించాలని మహిళా సంఘాలు, గిరిజన సంఘాల ప్రతినిధులు డిమాండ్ చేశారు.