రాష్ట్రంలో కరోనా ఉద్ధృతి కొనసాగుతోంది. కొత్తగా మరో 20 వేలకు పైగా కొత్త కేసులు నమోదయ్యాయి. గడిచిన 24 గంటల వ్యవధిలో.. రాష్ట్ర వ్యాప్తంగా 20,034 మందికి పాజిటివ్‌గా నిర్ధారణ అయినట్టు ఆరోగ్యశాఖ ముఖ్య కార్యదర్శి అనిల్‌ కుమార్‌ సింఘాల్‌ వెల్లడించారు. వైరస్ సోకి 82 మంది మృతి చెందినట్టు చెప్పారు.
వైరస్ బారిన పడి కోలుకుంటున్నవారి సంఖ్య క్రమంగా పెరుగుతోందన్నారు. రాష్ట్రంలో కొత్తగా 176 ప్రాథమిక ఆరోగ్య కేంద్రాలు ఏర్పాటు చేయనున్నట్టు వెల్లడించారు. ఇందుకోసం రూ.346 కోట్లు కేటాయించినట్టు వివరించారు. రాష్ట్రంలో ఆక్సిజన్‌ సౌకర్యం ఉన్న బెడ్లు 21,850 ఉన్నాయని తెలిపారు. రెమ్‌డెసివిర్‌ ఇంజెక్షన్ల కొరత లేదని స్పష్టం చేశారు.