తుపాకీతో కాల్చుకున్న కానిస్టేబుల్​.. పరిస్థితి విషమం

వ్యక్తిగత సమస్యలతో ఓ ఏఆర్​ కానిస్టేబుల్​ సర్వీస్​ తుపాకీతో కాల్చుకొని ఆత్మహత్యాయత్నానికి పాల్పడిన ఘటన తెలంగాణలోని కామారెడ్డి జిల్లా కేంద్రంలో చోటుచేసుకుంది. పరిస్థితి విషమంగా ఉండటం వల్ల హైదరాబాద్​కు తరలించారు.

విధి నిర్వహణలో ఉన్న ఓ ఏఆర్‌ కానిస్టేబుల్‌ తన సర్వీస్‌ తుపాకీతో కాల్చుకొని ఆత్మహత్యాయత్నానికి పాల్పడ్టారు. ఈ ఘటన తెలంగాణలోని కామారెడ్డి జిల్లా కేంద్రంలో కలకలం సృష్టించింది. జిల్లా కోశాగారం వద్ద గార్డ్‌ డ్యూటీ నిర్వహిస్తున్న శ్రీనివాస్‌గౌడ్‌ విధులు నిర్వర్తిస్తున్నాడు. ఉన్నట్టుండి తుపాకీతో కాల్చుకున్నాడు. తీవ్రంగా గాయపడిన శ్రీనివాస్​ను.. జిల్లా కేంద్ర ఆసుపత్రికి తరలించారు. జిల్లా ఎస్పీ శ్వేత, డీఎస్పీ లక్ష్మీనారాయణ జిల్లా కేంద్ర ఆసుపత్రికి చేరుకొని పరిస్థితిని పర్యవేక్షించారు. ఆరోగ్యం విషమించిన కారణంగా.. హైదరాబాద్‌కు తరలించారు. వ్యక్తిగత కారణాలే ఆత్మహత్యాయత్నానికి కారణమని పోలీసులు చెప్పారు.