తమిళనాడులో టీటీవీ దినకరన్ నేతృత్వంలోని 'అమ్మ మక్కల్ మున్నేట్ర కళగం'(ఏఎమ్ఎమ్కే)కి 'ప్రెషర్ కుక్కర్' గుర్తును ఇప్పటికిప్పుడే కేటాయించడానికి సుప్రీంకోర్టు నిరాకరించింది.
గతేడాది మార్చి 9న దిల్లీ హైకోర్టు దినకరన్ కూటమికి ఒక సాధారణ గుర్తును కేటాయించాలని ఎన్నికల సంఘాన్ని ఆదేశించింది. అది 'ప్రెషర్ కుక్కర్' గుర్తు అయినా ఫర్వాలేదని వ్యాఖ్యానించింది.
నాలుగు వారాల్లోగా దిల్లీ హైకోర్టు 'ఎన్నికల గుర్తు' కేసు విచారణను పూర్తిచేయకపోతే.... 2018 మార్చి 9 తీర్పును ఎన్నికల సంఘం అనుసరించవచ్చని సుప్రీంకోర్టు స్పష్టంచేసింది. తమిళనాడులో ఖాళీ అయిన స్థానాలకు నాలుగు వారాల్లోగా ఎన్నికలు నిర్వహించదలిచినా... దినకరన్ పార్టీకి ప్రెషర్ కుక్కర్ గుర్తును కేటాయించవచ్చని సర్వోన్నత న్యాయస్థానం చెప్పింది.
జయలలిత మరణం అనంతరం అన్నాడీఎంకే మొదలైన వర్గపోరు... చివరకు న్యాయపోరాటంగా మారింది. అన్నాడీఎంకే గుర్తయిన రెండాకుల గుర్తు కోసం దినకరన్ వర్గం న్యాయస్థానాల్ని ఆశ్రయించింది. ఇప్పుడు తాజాగా ప్రెషర్ గుర్తు కేటాయించాలని కోర్టును కోరింది.
తమిళనాడు మాజీ ముఖ్యమంత్రి జయలలిత మరణానంతరం ఖాళీ ఏర్పడిన రాధాకృష్ణన్ నగర్ అసెంబ్లీ స్థానానికి జరిగిన ఉపఎన్నికల్లో దినకరన్ పార్టీ ప్రెషర్ కుక్కర్ గుర్తుపై పోటీచేసి 40 వేల మెజారిటీతో గెలిచింది.
