దిల్లీ ఏసీబీపై కేంద్రానిదే అధికారం:సుప్రీం

కేంద్రం, దిల్లీ ప్రభుత్వం మధ్య అధికారాల పరిధి వివాదంపై సుప్రీంకోర్టు వైరుధ్య తీర్పు వెలువరించింది. సర్వీసుల విషయంలో న్యాయమూర్తుల మధ్య ఏకాభిప్రాయం కుదరకపోవడంతో ఈ విషయాన్ని విస్తృత ధర్మాసనానికి నివేదించింది.

అధికారాల విషయమై సర్వోన్నత న్యాయస్థానంలో దిల్లీ ప్రభుత్వానికి ఎదురుదెబ్బ తగిలింది. అవినీతి నిరోధక శాఖ, విచారణ కమిషన్‌ వంటివి లెఫ్టినెంట్‌ గవర్నర్‌ నియంత్రణలోనే ఉంటాయని సుప్రీంకోర్టు స్పష్టం చేసింది. అయితే సర్వీసులపై తీర్పులో ఏకాభిప్రాయం కుదరకపోవడం వల్ల ఆ విషయాన్ని విస్తృత ధర్మాసనానికి నివేదించింది.

కేంద్రం, దిల్లీ ప్రభుత్వం మధ్య అధికారాల పరిధిపై జస్టిస్​ సిక్రీ, జస్టిస్​ అశోక్ భూషణ్ ద్విసభ్య ధర్మాసనం విచారణ జరిపింది. ఏసీబీ, విచారణ కమిషన్​ల ఏర్పాటు, విద్యుత్ ​బోర్డుల నియంత్రణ, భూ రెవిన్యూ సర్వీసులు, పబ్లిక్​ ప్రాసిక్యూటర్ల నియామకంపై ధర్మాసనం ఏకాభిప్రాయం వ్యక్తంచేసింది.

ఏసీబీ, విచారణ కమిషన్​ల ఏర్పాటు కేంద్రం పరిధిలోనూ, విద్యుత్​ బోర్డు, రెవిన్యూ, పబ్లిక్​ ప్రాసిక్యూటర్ల నియామకం దిల్లీ ప్రభుత్వ పరిధిలోనూ ఉంటాయని స్పష్టం చేసింది. అయితే సర్వీసుల విషయంలో ఇద్దరు న్యాయమూర్తుల మధ్య ఏకాభిప్రాయం కుదరలేదు.

సంయుక్త కార్యదర్శి, ఆ పైస్థాయి అధికారుల నియామకం కేంద్రం పరిధిలోకి వస్తుందని, మిగిలిన అధికారుల నియామకం దిల్లీ ప్రభుత్వమే చేపట్టాలని జస్టిస్ సిక్రీ తీర్పు వెలువరించారు. ఐతే జస్టిస్ భూషణ్​ దీనిపై విభేదించారు. అన్ని స్థాయిల అధికారులు కేంద్రం పరిధిలోకి వస్తారని తీర్పు చెప్పారు. ఈ నేపథ్యంలో ఈ అంశాన్ని విస్తృత ధర్మాసనానికి నివేదించాలని నిర్ణయించారు.

తమ ఉద్యోగుల అవినీతిపై దిల్లీ ఏసీబీకి విచారణ చేసే అధికారం లేదన్న కేంద్రం నోటిఫికేషన్​ను సర్వోన్నత న్యాయస్థానం సమర్థించింది.