యంత్రాన్ని రూపొందిస్తున్న విద్యార్థి వినికిడి లోపం, మాట్లాడలేక పోవడం, కంటి చూపు సమస్యలతో బాధపడేవారికి ఇతరులతో సంభాషించడాన్ని సులభతరం చేసేందుకు వినూత్న పరికరాన్ని రూపొందిస్తున్నాడు బెంగళూరుకు చెందిన విద్యార్థి. హెచ్ఎం రోచన బెంగుళూరులోని ఏఎంసీ కళాశాలలో పన్నెండో తరగతి చదువుతున్నాడు.
ప్రోగ్రామింగ్, రోబోటిక్స్ అంటే రోచనకు అమితాసక్తి. ప్రొఫెసర్ డా.కె వెంకటేష్తో కలిసి అంధత్వ సమస్యలు గుర్తించే స్మార్ట్ కేన్ పరికరాన్ని అభివృద్ధి చేసేందుకు సహకారం అందించాడు. ఈ క్రమంలోనే దివ్యాంగులు సంభాషణలో ఎదుర్కొంటున్న సమస్యలు తీర్చేందుకు ప్రత్యేక యంత్రాన్ని ఆవిష్కరించాలని సంకల్పించాడు.
బ్లైండ్, డెఫ్ అండ్ డమ్(బీడీడీ) అసిస్ట్ యంత్రాన్ని రూపొందించేందుకు తన ఆలోచనలకు పేటెంట్ హక్కుల కోసం దరఖాస్తు చేసుకున్నాడు.
ప్రస్తుతం బ్రెయిల్ లిపి, సైగల ద్వారా మాత్రమే దివ్యాంగులు ఇతరులతో సంభాషిస్తున్నారు. రోచన రూపొందిస్తున్న యంత్రంతో ఇతర భాషల వారికి సైతం సందేశం చేరవేయడం సులభతరం అవుతుంది.
యంత్రాన్ని రూపొందిస్తున్న విద్యార్థి యంత్రం పని చేసే విధానం
బీడీడీ పరికరంలో ఇన్పుట్, అవుట్పుట్ మెథడ్స్ ఉంటాయి. ఇతరులతో సంభాషించాలనుకున్న వ్యక్తి తాను చెప్పాలనుకున్న విషయాన్ని మాటల్లో, రాతల్లో, సైగలలో, బ్రెయిల్ లిపిలో తెలియజేయాలి. వీటిని బీడీడీ పరికరం సరిగ్గా గుర్తించి ఎదుటి వారికి అర్థమయ్యే మాటల్లోకి, భాషలోకి తర్జుమా చేస్తుంది. అంతర్జాతీయ ప్రమాణాలను పరిగణలోకి తీసుకుంటుంది.
బ్రెయిలీ లిపిలో పొందుపరిచిన ఇన్పుట్ను యూనిఫైడ్ ఇంగ్లిష్ బ్రెయిలీ(యూఈబీ), అమెరికన్ సైన్ లాంగ్వేజ్(ఏఎస్ఎల్)ల ఆధారంగా అవుట్పుట్లోకి తర్జుమా చేస్తుంది. ఇంగ్లీష్ మాటలను, రాతను ప్రాంతీయ భాషల్లోకి అనువదించి తెరపై ప్రదర్శిస్తుంది.
ఆంగ్ల భాషను బెంగాలీ, గుజారాతీ, హిందీ, కన్నడ, మలయాళం, మరాఠీ, తమిళం, తెలుగు , ఉర్దూ భాషలతో పాటు ఇతర విదేశీ భాషల్లోకి తర్జుమా చేయగలదు ఈ యంత్రం.
బీడీడీ టీచింగ్ మోడ్
బ్రెయిలీ లిపి, సైగల గురించి అవగాహన లేని వారికి ఆ భాషలను నేర్పించే సదుపాయం ఈ పరికరంలో పొందుపరిచారు.
ఎక్కువ మందికి అందుబాటులో ఉండేలా ధరను రూ.6000లుగా నిర్ణయించారు. ఈ యంత్రాన్ని స్మార్ట్ఫోన్, టాబ్లెట్, కంఫ్యూటర్లకు సులభంగా అనుసంధానం చేసుకోవచ్చు.
