కనీస వేతనం రోజుకు రూ.375!

కార్మికులకు కనీస వేతనం నిర్ణయించేందుకు కేంద్ర కార్మిక, ఉపాధి మంత్రిత్వశాఖకు నిపుణుల కమిటీ కొత్త నిబంధనావళి ప్రతిపాదించింది.

కార్మికుల కనీస వేతనం రోజుకు రూ.375 లేదా నెలకు రూ.9,750గా ఉండాలని కేంద్ర కార్మిక ఉపాధి మంత్రిత్వ శాఖకు డాక్టర్​ స్నూప్​ సత్పతి నేతృత్వంలోని నిపుణుల కమిటీ సిఫార్సు చేసింది. రంగం, నైపుణ్యం, గ్రామీణ, పట్టణ ప్రాంతాలకు అతీతంగా ఈ వేతనం ఇవ్వాలని సూచించింది.

పట్టణాల్లో పని చేసే కార్మికులకు అదనంగా రోజుకు రూ.55 లేదా నెలకు రూ.1,430 ఇంటి అద్దె భత్యం ఇవ్వాలని ప్రతిపాదించింది సత్పతి కమిటీ.

ప్రాంతీయ, సామాజిక, ఆర్థిక పరిస్థితులను అనుసరించి వేతన నిర్ణయం కోసం రాష్ట్రాలను 5 భాగాలుగా విభజించింది సత్పతి కమిటీ. ఆయా ప్రాంతాల కార్మికులకు కనీస వేతనం రోజుకు కనిష్ఠంగా రూ.342, గరిష్ఠంగా రూ.447గా నిర్ణయించారు.

మదింపు ఇలా...

కనీస వేతనంపై సిఫార్సులు చేసేందుకు జాతీయ నమూనా సర్వే (ఎన్​ఎస్​ఎస్​ఓ) గణాంకాలను పరిగణనలోకి తీసుకుంది సత్పతి కమిటీ. చిల్లర ధరల ఆధారిత ద్రవ్యోల్బణం మార్పులకు తగినట్లుగా కనీస వేతనాన్ని ప్రతి 6నెలలకు ఒకసారి సవరించాలని సూచించింది.

జాతీయ కనీస వేతనాలను నిర్ణయించేందుకు 2017 జనవరి 17న డాక్టర్​ స్నూప్ సత్పతి, వి.వి. గిరి నేతృత్వంలో కేంద్ర కార్మిక ఉపాధి మంత్రిత్వ శాఖ ఈ కమిటీని నియమించింది.