వీడియోకాన్ గ్రూపుకు ఐసీఐసీఐ బ్యాంకు రూ.1875 కోట్లు అక్రమ రుణం మంజూరు చేసిన కేసులో ఎన్ఫోర్స్మెంట్ డైరెక్టరేట్ దర్యాప్తు ముమ్మరం చేసింది. ప్రధాన నిందితులు ఐసీఐసీఐ బ్యాంక్ మాజీ సీఈఓ చందాకొచ్చర్, ఆమె భర్త దీపక్ కొచ్చర్, వీడియోకాన్ గ్రూప్ ప్రమోటర్ వేణుగోపాల్ ధూత్పై ఈడీ (క్రిమినల్ కేసు) మనీలాండరింగ్ కేసు నమోదుచేసింది.
గత నెలలో సీబీఐ నమోదు చేసిన కేసు ఆధారంగా ఈడీ ఈ కేసు నమోదు చేసింది. పోలీస్ ఎఫ్ఐఆర్ తరహాలో 'ఎన్ఫోర్స్మెంట్ కేసు దర్యాప్తు నివేదిక (ఈసీఐఆర్)'ను ఈడీ నమోదు చేసింది. త్వరలోనే నిందితులను విచారణకు పిలవనుంది.
వీడియోకాన్కు రుణం మంజూరు చేసే విషయంలో డొల్ల కంపెనీలను సృష్టించారా? అనే కోణంలో ఈడీ దర్యాప్తు చేస్తోంది. వీడియోకాన్కు ఐసీఐసీఐ బ్యాంకు రుణం మంజూరు చేసిన కొద్ది రోజుల్లోనే కంపెనీ ప్రమోటర్ వేణుగోపాల్ ధూత్, ఐసీఐసీఐ బ్యాంక్ మాజీ సీఈఓ చందాకొచ్చర్ భర్త దీపక్ కొచ్చర్కు చెందిన న్యూపవర్ ఎనర్జీలో పెట్టుబడులు పెట్టినట్లు ఈడీ గుర్తించింది.
తర్వాత పరిణామాల్లో వీడియోకాన్కు అందించిన రుణాలను 2012లో నిరర్ధక ఆస్తులుగా ప్రకటించారు. ఫలితంగా ఐసీఐసీఐ బ్యాంకుకు రూ.1,730 కోట్ల నష్టం వాటిల్లింది. దీంతో ఈ రుణ మంజూరు వ్యవహారంలో క్విడ్ప్రోకో (నీకది, నాకిది) జరిగినట్లు ఈడీ కేసు నమోదు చేసింది.
