101 பேருக்கு செயற்கை கை, கால் பொருத்தும் முகாம்!

விருதுநகர்: தனியார் தொண்டு நிறுவனம் சார்பாக 101 பேருக்கு செயற்கையாக கை, கால் பொருத்தும் முகாம் நடைபெற்றது.

விருதுநகரில் சுதந்திர தினத்தை முன்னிட்டு தனியார் தொண்டு நிறுவனம் சார்பாக விபத்து, சர்க்கரை நோய் போன்ற காரணங்களால் கை, கால்களை இழந்து தன்னிச்சையாக செயல்பட முடியாமல் அவதிப்படும் ஏழை எளியோர்கள் 101 பேருக்கு செயற்கையாக கை, கால் பொருத்தும் முகாம் நடைபெற்றது. இந்த முகாமை மாவட்ட ஆட்சியர் சிவஞானம் தொடங்கி வைத்தார்.

இந்த முகாமில் விருதுநகர், ராமநாதபுரம், சிவகங்கை, கன்னியாகுமரி, திருநெல்வேலி, தூத்துக்குடி, போன்ற ஆறு மாவட்டங்களைச் சேர்ந்த ஆறு வயது முதல் 55 வயது வரை உள்ளவர்களில் 95 பயனாளிகளுக்கு செயற்கையாக கால்களும், ஆறு பயனாளிகளுக்கு செயற்கையாக கைகளும் வழங்கப்பட்டன. இந்தத் திட்டத்தை ஏற்பாடு செய்த தொண்டு நிறுவனத்தினர் இனி ஆண்டுதோறும் ஆகஸ்ட் 15ஆம் தேதியன்று செயற்ககை கை, கால் வழங்கப்படும் என தெரிவித்தனர்.