சட்டமேதை அம்பேத்கர் சிலை அவமதிப்பு!

வேலூர்: புதூர் பகுதியில் சட்டமேதை அம்பேத்கர் சிலையை அவமதிக்கும் விதமாக அடையாளம் தெரியாத நபர்கள் தவறான வாசகங்கள் அடங்கிய பதாதைகளை சிலையில் தொங்கவிட்டதால் பரபரப்பு ஏற்பட்டது.

வேலூர் மாவட்டம் அணைக்கட்டு ஊசூர் அடுத்த புதூர் பகுதியில் அம்பேத்கர் சிலை அமைந்துள்ளது. இந்தச் சிலையில், இன்று அடையாளம் தெரியாத நபர்கள் தவறான வார்த்தைகளால் பொறிக்கப்பட்ட வாசகங்கள் அடங்கிய பதாதையை கட்டி தொங்கவிட்டனர். இந்த பதாதையைக் கண்ட அப்பகுதி மக்கள், அம்பேத்கர் சிலை அவமதிக்கப்பட்டதைக் கண்டித்து கோஷங்கள் எழுப்பினர்.

பின்னர் தகவல் அறிந்து வந்த விடுதலை சிறுத்தைகள் கட்சியினர் பொதுமக்களோடு இணைந்து அம்பேத்கர் சிலையை அவமதித்தவர்களை கைது செய்யக்கோரி சாலை மறியலில் ஈடுபட்டனர். இதனையடுத்து மறியலில் ஈடுபட்டவர்களோடு காவல் துறையினர் பேச்சுவார்த்தை நடத்திக் கூட்டத்தைக் கலைந்துபோகச் செய்தனர்.