மின்னல் தாக்கி கர்ப்பிணி, சகோதரர் உயிரிழப்பு!

திருச்சி: துறையூர் அருகே அம்மம்பாளையத்தில் ஒரே குடும்பத்தைச் சேர்ந்த இருவர் மின்னல் தாக்கி உயிரிழந்த சம்பவம் அப்பகுதியினரிடையே சோகத்தை ஏற்படுத்தியுள்ளது.

திருச்சி மாவட்டம் துறையூர் அருகே அம்மம்பாளையம் கிராமத்தில் வசித்து வரும் லட்சுமணன் - ராஜாமணி தம்பதிக்கு முத்துலட்சுமி (21), குணா (17) என இரண்டு குழந்தைகள் இருக்கின்றனர். முத்துலட்சுமி திருமணம் முடிந்து 8 மாத கர்ப்பிணியாக உள்ளார். குணா பன்னிரெண்டாம் வகுப்பு முடித்து கல்லூரியில் சேருவதற்காக காத்திருக்கிறார். பெரம்பலூரில் வசிக்கும் முத்துலட்சுமி, சில நாட்களுக்கு முன்பு தனது அம்மா வீட்டிற்கு வந்துள்ளார்.

இதனையடுத்து, நேற்று மாலை தம்பி குணாவுடன் முத்துலட்சுமி மாடு மேய்க்க சென்றபோது மாலை நான்கு மணி அளவில் மழை பெய்ததால், அருகிலிருந்த தகர கொட்டகையில் இருவரும் தஞ்சமடைந்துள்ளனர். இந்நிலையில், திடீரென பலத்த இடியுடன் கூடிய மின்னல் தாக்கியது. இதில் இருவரும் சம்பவ இடத்திலேயே உயிரிழந்துள்ளனர்.

மின்னல் தாக்கிய இடத்திலிருந்து சற்று தொலைவில் இருந்த நில உரிமையாளர் இருவரைக் கண்டு கிராமத்தினருக்கு தகவல் அளித்துள்ளார். பின்னர் கிராம மக்கள் சார்பாக காவல்துறையினருக்கு தகவல் கொடுக்கப்பட்டது. சம்பவ இடத்திற்கு வந்த காவல்துறையினர் உடல்களைக் கைப்பற்றி பிரேத பரிசோதனைக்காக துறையூர் அரசு மருத்துவமனைக்கு அனுப்பி வைத்தனர். பின்னர் முத்துலட்சுமியின் வயிற்றில் இருந்த 8 மாத சிசுவையும் அப்புறப்படுத்தினர். பின்னர் உடல்கள் குடும்பத்தினரிடம் ஒப்படைக்கப்பட்டபோது கதறி அழுத காட்சி அப்பகுதியினரிடையே சோகத்தை ஏற்படுத்தியுள்ளது.