திருச்சி நாடாளுமன்றத் தேர்தலில் பயன்படுத்தப்பட்ட வாக்குப்பெட்டிகள் தனி அறையில் வைத்து வேட்பாளர்களின் முகவர்கள் முன்னிலையில் சீல் வைக்கப்பட்டது.
திருச்சி நாடாளுமன்றத் தொகுதிகளுக்கான வாக்குப்பதிவு நேற்று மாலை 6 மணியுடன் முடிவடைந்தது. பின்னர் வாக்குச்சாவடிகளில் பயன்படுத்தப்பட்ட மின்னணு வாக்குப்பதிவு இயந்திரங்களுக்கு அங்கேயே சீல் வைக்கப்பட்டு லாரிகள் மூலம் திருச்சி-மதுரை சாலையில் உள்ள சாரநாதன் பொறியியல் கல்லூரியில் அமைக்கப்பட்டுள்ள வாக்கு எண்ணும் மையத்திற்கு கொண்டு செல்லப்பட்டது.
நேற்றிரவு ஆரம்பித்த இந்தப் பணி இன்று மதியம் வரை நடைபெற்றது. திருச்சி கிழக்கு, திருச்சி மேற்கு, ஸ்ரீரங்கம், திருவெறும்பூர், புதுக்கோட்டை, கந்தர்வகோட்டை ஆகிய 6 சட்டமன்ற தொகுதிகளில் பயன்படுத்தப்பட்ட வாக்கு இயந்திரங்கள் தொகுதி வாரியாக பிரிக்கப்பட்டு அறைகளில் அடுக்கப்பட்டது.
இதனையடுத்து வாக்குப்பதிவு இயந்திரங்களுக்கு வேட்பாளர்கள் மற்றும் முகவர்களின் முன்னிலையில் மாவட்ட ஆட்சியரும், தேர்தல் அலுவலருமான சிவராசு, தேர்தல் பொது பார்வையாளர் அமித் குமார் ஆகியோர் முன்னிலையில் சீல் வைக்கப்பட்டது.
மேலும் சீல் வைக்கப்பட்ட அறைக்கு துப்பாக்கி ஏந்திய துணை ராணுவத்தினர் பாதுகாப்பு பணியில் ஈடுபடுத்தப்பட்டனர். வாக்கு எண்ணும் மையத்தின் வளாகம் முழுவதும் சுழற்சி முறையில் 5 அடுக்கு பாதுகாப்பு போடப்பட்டுள்ளது. துப்பாக்கி ஏந்திய காவல்துறையினர் 24 மணிநேரமும் ரோந்து பணியில் ஈடுபடுத்தப்பட்டுள்ளனர் என்பது குறிப்பிடத்தக்கது.