ஒரே இரவில் அடுத்தடுத்த 10 கடைகளில் கொள்ளை - பீதியில் வியாபாரிகள்

திருவள்ளூர்: திருத்தணி பேருந்து நிலையம் அருகே அடுத்தடுத்துள்ள பத்து கடைகளின் பூட்டை உடைத்து பணம், பொருள்கள் கொள்ளையடிக்கப்பட்ட சம்பவம் அப்பகுதி வியாபாரிகளிடையே பீதியை ஏற்படுத்தியுள்ளது.

திருவள்ளூர் மாவட்டம் திருத்தணி பேருந்து நிலையம் அருகே அரக்கோணம் சாலையில் நகை, செல்போன், வீட்டு அலங்காரப் பொருள்கள் உள்ளிட்ட ஏராளமான கடைகள் உள்ளன. நாள் முழுவதும் பரபரப்பாக காணப்படும் இச்சாலையில் காவல் துறையினர் அடிக்கடி ரோந்து பணியில் ஈடுபடுவது வழக்கம்.

இருப்பினும், நேற்று நள்ளிரவு கொள்ளையர்கள் அடுத்தடுத்து உள்ள பத்து கடைகளின் பூட்டை உடைத்து, அதில் மூன்று கடைகளில் ரூ.1.50 ஆயிரம் பணம், விலை உயர்ந்த செல்போன்கள், விலை உயர்ந்த பொருள்கள் ஆகியவற்றை கொள்ளையடித்துச் சென்றுள்ளனர்.

கண்காணிப்பு கேமரா பொருத்தப்பட்டுள்ள கடைகளைத் தவிர்த்து, மற்ற கடைகளில் கொள்ளையர்கள் கைவரிசை காட்டியுள்ளனர். திருத்தணி நகரில் சமீபகாலமாக இருசக்கர வாகனங்கள் திருட்டு அதிகரித்து வந்த நிலையில், ஒரே இரவில் பத்து கடைகளில் கொள்ளைச் சம்பவம் நிகழ்ந்துள்ளது அப்பகுதி வியாபாரிகளிடையே பெரும் அச்சத்தை ஏற்படுத்தியுள்ளது.

இதையும் படிங்க: வீட்டின் கதவை உடைத்து நகை, பணம் கொள்ளை!