திருவள்ளூர்:திருமழிசை சிப்காட் பகுதியில் திருவள்ளூர் கிழக்கு, காஞ்சிபுரம் மேற்கு மாவட்ட மொத்த டாஸ்மாக் கிடங்கு அமைந்துள்ளது. இந்த பகுதியிலிருந்து திருவள்ளூர், காஞ்சிபுரம், சென்னை மாவட்டத்தில் உள்ள 350-க்கும் மேற்பட்ட சில்லறை மதுபான விற்பனை, அரசு மதுபான கடைகள், மற்றும் 120 நட்சத்திர ஹோட்டல்களில் இயங்கி வரும் மதுபான கூடங்களுக்கும் லாரிகள் மூலம் மதுபானம் அனுப்பி வைக்கப்பட்டு வருகிறது.
இந்நிலையில், மதுபானங்கள் கொண்டு செல்லும் லாரி டிரான்ஸ்போர்ட் நிர்வாகத்திற்குக் கடந்த நான்கு மாதங்களுக்கும் மேலாக டாஸ்மார்க் நிர்வாகம் பணம் கொடுக்கவில்லை என கூறப்படுகிறது. போக்குவரத்து மற்றும் சுமை தூக்கும் தொழிலாளர்களுக்கு சம்பளம் ரூ.4.75 கோடி நிலுவையில் வைத்துள்ளதாகவும் அது குறித்து டாஸ்மாக் நிர்வாகம் இன்று வரை பேச்சுவார்த்தை நடத்தாமல் அலைக்கழிப்பதாகவும் கூறி, திருமழிசை அரசு மதுபானக் கிடங்கில் 60க்கும் மேற்பட்ட மதுபானங்கள் ஏற்றிச் செல்லும் லாரிகளை நிறுத்தி, நூற்றுக்கும் மேற்பட்ட தொழிலாளர்கள் போராட்டத்தில் ஈடுபட்டனர்.