அரசு ஊழியர் வீட்டில் தங்கம் உள்ளிட்ட பொருட்கள் திருட்டு!

திருவள்ளூர்: மீஞ்சுர் அருகே அரசு ஊழியர் வீட்டின் பூட்டை உடைத்து ஒன்றரை லட்சம் மதிப்புடைய தங்கம் உள்ளிட்ட பொருட்கள் திருடப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

மீஞ்சூர் அருகே கேசவ புரம் பகுதியைச் சேர்ந்தவர் ஷர்மிளா. கிராம நிர்வாக அலுவலரான இவர், ஆந்திர மாநிலம் காளகஸ்திக்கு தேர்வு எழுத தன் கணவர் மற்றும் மகனுடன் சென்றுள்ளார்.

இந்த நிலையில், தேர்வை முடித்துவிட்டு வீடு திரும்பிய அவர், வீட்டின் பூட்டு உடைக்கப்பட்டிருப்பதை கண்டு அதிர்ச்சியுற்றார்.

பின்னர், இதுகுறித்து மீஞ்சூர் காவல் நிலையத்தில் புகார் அளித்தார். அதன் அடிப்படையில், சம்பவ இடத்திற்கு சென்ற காவல் துறையினர் ஆய்வு மேற்கொண்டதில், அடையாளம் தெரியாத நபர்கள் சிலர் வீட்டின் பூட்டை உடைத்து உள்ளே புகுந்து பீரோவிலிருந்த ஒன்றரை லட்சம் ரூபாய் மதிப்புடைய தங்கம், ஒன்றரை கிலோ வெள்ளிப் பொருட்கள், டிவி உள்ளிட்ட விலையுயர்ந்த பொருட்களை திருட்டிச் சென்றதை கண்டறிந்தனர். தொடர்ந்து, மர்ம நபர்கள் விட்டுச் சென்ற தடயங்களை சேகரித்த காவல் துறையினர், விசாரணை மேற்கொண்டு வருகின்றனர்.