வனப்பகுதியில் தாது உப்பு கட்டிகள் தூவும் பணி

நீலகிரி: வனத் துறையினர் முதுமலை வனப்பகுதியில் உள்ள வன விலங்குகளுக்கு தாது உப்பு கட்டிகள் தூவும் பணியில் ஈடுபட்டுள்ளனர்.

முதுமலை புலிகள் காப்பகத்தை ஒட்டி கேரளாவின் முத்தங்கா வனவிலங்கு சரணாலயமும், கர்நாடகத்தின் பந்திப்பூர் புலிகள் காப்பகமும் உள்ளது. தொடர்ச்சியாக அடர் வனப்பகுதி உள்ளதால் இது ஏராளமான வன உயிரினங்களின் வாழ்விடமாக உள்ளது. இங்கு மான்கள், யானைகள், காட்டு எருமைகள் உள்ளிட்ட தாவர உண்ணி இனங்கள், பாலூட்டி இனங்கள் என ஏராளமாக காணப்படுகின்றன.

பொதுவாக இவை தங்களது உடலில் தாது உப்புக்கள், கனிமங்கள், வைட்டமின்களின் தேவைக்காக மண்ணில் உள்ள தாது உப்புக்களை இயற்கையாகவே தேடி சாப்பிடுவது வழக்கம். இதற்காக வனத் துறையினர் வனப்பகுதிகளில் வைட்டமின்கள், மினரல்கள் அடங்கிய உப்புக் கட்டிகளை போடுவது வழக்கம்.

இந்நிலையில், வனத் துறையினர் வனவிலங்குகளுக்குப் பயனளிக்கும் தாது உப்புக்கட்டிகளை முதுமலை புலிகள் காப்பகத்திலும், முதுமலை புலிகள் காப்பகத்தில் சுற்றுலாப் பயணிகளின் வாகனங்கள் செல்லும் பாதையிலும், நீர் நிலைகளிலும் தூவினர்.

நீர் நிலைகளிலும், முதுமலை புலிகள் காப்பகத்தில் சுற்றுலாப் பயணிகளின் வாகனங்கள் செல்லும் பாதையிலும் தூவப்படும் தாது உப்புக்களை வன விலங்குகள் உண்ணவரும்போது சுற்றுலாப் பயணிகள் வனவிலங்களை நேரடியாகப் பார்க்கும் சூழல் ஏற்படுவதால் மிகவும் மகிழ்ச்சியடைகின்றனர்.