பிரபல லாட்டரி வியாபாரி வீட்டில் வருமான வரிச் சோதனை: கட்டுக்கட்டாக பணம் சிக்கியது!

சேலம்: லாட்டரி சீட்டு வியாபாரியின் வீட்டில் கணக்கில் வராத சுமார் 30 லட்சம் ரூபாயை வருமான வரித்துறை அதிகாரிகள் பறிமுதல் செய்துள்ளனர்.

சேலம் மாவட்டம் சங்கர் நகரைச் சேர்ந்தவர் லாட்டரி சீட்டு வியாபாரி கண்ணன். இவர்தடைசெய்யப்பட்டுள்ள லாட்டரி சீட்டுகளை சட்டவிரோதமாக வீட்டில் பதுக்கி வைத்து விற்பனை செய்வதாக அஸ்தம்பட்டி காவல்துறையினருக்கு தகவல் கிடைத்தது.

இதனையடுத்து உதவி ஆணையர் ஆனந்தகுமார் தலைமையிலான காவலர்கள், கண்ணன் வீட்டுக்குச் சென்று சோதனை நடத்தினர். அப்போது லாட்டரி சீட்டுடன் கத்தை கத்தையாக பணமும் இருந்தது கண்டுபிடிக்கப்பட்டது. அதைத்தொடர்ந்து வருமான வரித்துறை அதிகாரிகள் அங்கு வரவழைக்கப்பட்டனர்.

அவர்கள் மேற்கொண்ட சோதனையில் கணக்கில் வராத சுமார் 30 லட்சம் ரூபாய், 200 சவரன் தங்க நகைகள் ஆகியவைபறிமுதல் செய்யப்பட்டது. இதுகுறித்து, வருமானவரித்துறை அதிகாரிகள் விசாரணை நடத்தி வருகின்றனர்.