பெரம்பலூரில் வழக்கறிஞர்கள் நீதிமன்ற புறக்கணிப்பு!

பெரம்பலூர்: வழக்கறிஞர் அருள் குண்டர் தடுப்பு சட்டத்தில் கைது செய்யப்பட்டதைக் கண்டித்து, பெரம்பலூர் வழக்கறிஞர்கள் நீதிமன்ற புறக்கணிப்பு போராட்டத்தில் ஈடுபட்டுள்ளனர்.

பெரம்பலூரில் வேலை வாங்கித் தருவதாக கூறி இளம்பெண்களை ஏமாற்றி பாலியல் வன்கொடுமை செய்ததாக அதிமுக எம்.எல்.ஏ மீது நாம் தமிழர் கட்சியின் மாவட்ட செயலாளரும், வழக்கறிஞருமான அருள் பாலியல் புகார் ஒன்றை தெரிவித்தார். மேலும், பாதிக்கப்பட்ட பெண் தன்னிடம் பேசியதாக ஆடியோ ஒன்றையும் வெளியிட்டு பெரும் பரபரப்பை ஏற்படுத்தினார்.

இதையடுத்து, அவர் மீது அதிமுக அளித்த புகாரின் அடிப்படையில், வழக்கறிஞர் அருள் தீண்டாமை வன்கொடுமை சட்டம் மற்றும் தகவல் தொழில் நுட்பத்தை தவறாக பயன்படுத்துதல் உள்ளிட்ட பிரிவுகளின் கீழ் வழக்குப்பதிவு செய்யப்பட்டு கைது செய்யப்பட்டார். இதனிடையே, கடந்த வாரம் வழக்கறிஞர் அருள் மீது குண்டர் தடுப்பு சட்டம் பாய்ந்தது.

இந்நிலையில், வழக்கறிஞர் அருள் குண்டர் தடுப்பு சட்டத்தின் கீழ் கைது செய்யப்பட்டதற்கு எதிராக தமிழ்நாடு அரசை கண்டித்தும், குண்டர் சட்ட நடவடிக்கையை தமிழ்நாடு அரசு உடனடியாக திரும்பப் பெற வலியுறுத்தியும் பெரம்பலூர் வழக்கறிஞர் சங்கம், பெரம்பலர் பார் அசோஷியேஷன் சார்பில், வழக்றிஞர்கள் இன்று முதல் மே 17ஆம் தேதி வரை நீதிமன்ற புறக்கணிப்பு போராட்டத்தில் ஈடுபடுவதாக அறிவித்துள்ளனர்.

மேலும், மேற்கண்ட கோரிக்கையை நிறைவேற்றவில்லை எனில் பல்வேறு போராட்டங்கள் நடைபெறும் எனவும் வழக்கறிஞர்கள் எச்சரிக்கை விடுத்துள்ளனர்.