நண்பர்களால் இளைஞருக்கு நேர்ந்த கொடூரம்: மதுரையில் பரபரப்பு

மதுரையில் கொத்தனார் வேலை செய்யும் இளைஞர் ஒருவர், தனது நண்பர்களால் கொலைசெய்யப்பட்டது அதிர்ச்சியை ஏற்படுத்தியுள்ளது.

மதுரை:எம்.கே. புரம் பிரதான சாலைப் பகுதியைச் சேர்ந்த அக்னிராஜ் (27), கொத்தனாராக வேலை பார்த்துவந்தார். இந்நிலையில் அக்னிராஜ் நேற்று (ஜனவரி 30) இரவு வேலை முடிந்து வீட்டுக்கு வந்த பிறகு நண்பர்களோடு வெளியில் சென்றுள்ளார். அதற்குப் பிறகு அக்னி ராஜ் வீடு திரும்பவில்லை.

இதற்கிடையே ஜீவா நகர் 2ஆவது தெரு கணேசன் சாலைப் பகுதியில் உள்ள ஒயின்ஷாப் கடையின் பின்புறம் அக்னி ராஜ் படுகாயங்களுடன் கிடப்பதாகத் தகவல் கிடைத்தது. நிகழ்விடத்திற்குச் சென்ற உறவினர்கள் அக்னி ராஜை மீட்டு மருத்துவமனைக்கு கொண்டுசென்றனர். ஆனாலும் வழியிலேயே அக்னிராஜ் இறந்ததாகக் கூறப்படுகிறது.

இது குறித்து காவல் துறைக்குப் புகார் அளிக்கப்பட்டது. புகாரின் அடிப்படையில் ஜெய்ஹிந்த்புரம் காவலர்கள் சம்பவம் குறித்து வழக்குப்பதிவு செய்து, அக்னிராஜின் உடலை மீட்டு உடற்கூராய்வுக்காக அரசு இராசாசி மருத்துவமனைக்கு அனுப்பிவைத்தனர். பின்னர் சம்பவம் குறித்து தீவிர விசாரணை நடத்தினர்.

காவலர்களின் முதற்கட்ட விசாரணையில், அக்னிராஜ் தனது நண்பர்களுடன் மது அருந்த ஜீவா நகர் பகுதிக்குச் சென்றபோது, அங்கு அவர்கள் இடையே நடந்த தகராறில் நண்பர்கள் இருவரும் அக்னி ராஜை சரமாரியாகத் தாக்கிவிட்டு கல்லை தூக்கிப் போட்டு கொலைசெய்துள்ளனர் எனத் தெரியவந்தது.

இதையடுத்து ஜெய்ஹிந்த்புரம் காவல் துறையினர் அக்னிராஜ் உடன் தொடர்பில் இருந்த நண்பர்கள் உள்பட ஐந்திற்கும் மேற்பட்டோரை காவல் நிலையத்திற்கு அழைத்துச் சென்று, அவர்களிடம் இது தொடர்பாக மேலும் தீவிர விசாரணை நடத்திவருகின்றனர்.