‘வைகோ ஒரு தேசவிரோத சக்தி’ - ஹெச். ராஜா

மதுரை: வைகோ குறித்த எனது கருத்தை தான் நீதிமன்றம் தீர்ப்பாக வழங்கியுள்ளது என பாஜக தேசிய செயலாளர் ஹெச். ராஜா தெரிவித்துள்ளார்.

மதுரையில் பாஜக தேசிய செயலாளர் ஹெச். ராஜா செய்தியாளர்களைச் சந்தித்தார். அப்போது, ‘பட்ஜெட்டில், மத்திய அரசு ரூ.5 லட்சம் வரை வருமான வரி விலக்கு அளித்துள்ளது. இது நடுத்தர, கீழ் நடுத்தர மக்களுக்கு ஆதரவாக அமைந்துள்ளது. அதுமட்டுமின்றி, விவசாயம், வேலைவாய்ப்பு சார்ந்த விஷயங்களுக்கு முன்னுரிமை அளித்துள்ளதோடு, விவசாயத்தில் அரசாங்கமே நேரடியாக முதலீடு செய்யும் என்று அறிவித்திருப்பது முதல் முறையாகும். கிராமப்புற வளர்ச்சி, வேலை வாய்ப்பினை மையமாகக் கொண்டு இந்த பட்ஜெட் கொண்டு வரப்பட்டுள்ளது.

‘தர்மத்தின் வாழ்வு தனை சூது கவ்வும்; தர்மம் மறுபடி வெல்லும்’ என்ற கூற்றின்படி திமுக கூட்டணி 37 தொகுதிகளில் வெற்றி பெற்றிருந்தாலும், வேலூர் தொகுதியில் மறுபடி தர்மம் வெல்லும். வைகோ ஒரு தேசவிரோத சக்தி என்று நான் பலமுறை கூறி வருவதையே இன்றைய நீதிமன்ற தீர்ப்பும் உறுதி செய்துள்ளது. தமிழகத்தில் சாலை வசதிகள் தொழிற்சாலைகளே வரக்கூடாது என்ற நோக்கத்தில் வைகோ, சீமான், திருமாவளவன் உள்ளிட்ட நபர்களும், மக்கள் அதிகாரம், மே 17 உள்ளிட்ட அமைப்புகளும் இயங்கி வருகிறார்கள். அவர்கள் அனைவருமே அர்பன் நக்சல்கள்’ என்றார்.

மேலும், உதயநிதி ஸ்டாலின் திமுகவின் இளைஞரணி செயலாளராக நியமிக்கப்பட்டது தொடர்பான கேள்விக்கு, ‘திமுக ஒன்றும் சங்கர மடம் அல்ல என்று கருணாநிதி தெரிவித்திருந்தார். ஆனால் சங்கர மடங்களில் வாரிசுகள் யாரும் வருவதில்லை. திமுகவில் தான் தற்போது அது நடந்துவருகிறது. இருப்பினும், உதயநிதி ஸ்டாலினுக்கு எனது வாழ்த்துகளைத் தெரிவித்துக்கொள்கிறேன்' என ஹெச். ராஜா தெரிவித்தார்.