நடிகர் விஜய்-இயக்குநர் அட்லி கூட்டணியில் பிகில் திரைப்படம் தீபாவளிப் பண்டிகையை முன்னிட்டு இன்று வெளியாகியுள்ளது. பல்வேறு சர்ச்சைகளில் சிக்கி இன்று ஒருவழியாக இந்தப்படம் அறிவித்தபடி திரைக்கு வந்துள்ளது. விஜய் ரசிகர்கள் அதிகாலை முதலே படத்தைக் காண திரையரங்குகளில் குவிந்தவண்ணம் உள்ளனர்.
இதனிடையே கிருஷ்ணகிரி ரவுண்டானா அருகே உள்ள திரையரங்கில் பிகில் சிறப்புக்காட்சி நள்ளிரவு வெளியாகவில்லை எனக்கூறி விஜய் ரசிகர்கள் வன்முறையில் ஈடுபட்டனர். இதனால் ரவுண்டானா சிக்னலில் வைக்கப்பட்டிருந்த கண்காணிப்புக் கேமராக்கள், போலீசாரின் ஒலிபெருக்கிகள், தீபாவளியை முன்னிட்டு போலீசார் அமைத்திருந்த கட்டைகளால் ஆன மேடை ஆகியவை முற்றிலுமாக சேதம் அடைந்தன.
மேலும், ரவுண்டானாவில் நகராட்சி சார்பில் வைக்கப்பட்டிருந்த சின்டெக்ஸ் தண்ணீர் தொட்டி உடைத்து நொறுக்கப்பட்டது. பல்வேறு கடைகளின் பேனர்கள் கிழித்து எறியப்பட்டதோடு, தீ வைத்து எரிக்கப்பட்டன. இதையடுத்து அங்கு விரைந்த அதிவிரைவுப் படை காவல் துறையினர் விஜய் ரசிகர்களை தடியடி நடத்திக் கலைத்தனர். இந்தச் சம்பவம் தொடர்பாக 37 பேரை பிடித்து விசாரணை நடத்தி வருகின்றனர்.