கிருஷ்ணகிரியில் மாவட்ட அளவிலான சிலம்பம் போட்டி!

கிருஷ்ணகிரி: ஓசூர் தனியார் பள்ளி ஒன்றில் நடந்த மாவட்ட அளவிலான சிலம்பம் போட்டியில், 20-க்கும் மேற்பட்ட பள்ளிகளில் பயிலும் மாணவ மாணவியர் பங்கேற்று பரிசுகளை அள்ளிச்சென்றனர்.

கிருஷ்ணகிரி மாவட்ட சிலம்பம் விளையாட்டு சங்கம் சார்பில், மாவட்ட அளவிலான சிலம்பம் விளையாட்டுப் போட்டிகள், ஓசூரில் உள்ள தனியார் பள்ளியில் நடந்தது. அரசு, அரசு உதவிபெறும், மெட்ரிக் என மொத்தம் 20 பள்ளிகளிலிருந்து 315 மாணவ மாணவியர் இந்தப் போட்டிகளில் பங்கேற்றனர்.

5 முதல் 11 வயது வரையுள்ள மாணவ மாணவியருக்கு தனித்திறன் சிலம்பம் போட்டியும் 11 முதல் 30 வயதுக்குட்பட்டவர்களுக்கு வயது மற்றும் எடை அடிப்படையில் மோதல் போட்டிகளும் நடத்தப்பட்டன.

தமிழ்நாடு சிலம்பம் விளையாட்டு சங்கத் தலைவர் சந்திரமோகன் போட்டிகளை தொடங்கிவைத்தார். போட்டிகளில் வெற்றிபெற்ற மாணவ மாணவியர் மண்டல அளவிலான போட்டிக்கு தேர்வு செய்யப்பட்டனர். வெற்றிபெற்ற மாணவ மாணவியருக்கு ஓசூர் காவல் துணை கண்காணிப்பாளர் மீனாட்சி, மாவட்ட உடற்கல்வி ஆய்வாளர் வளர்மதி ஆகியோர் பரிசுகள் வழங்கி பாராட்டினர்.