பைனான்ஸ் நிறுவனத்தின் வசூல் வேட்டை: வேதனையில் மக்கள்

மைக்ரோ பைனான்ஸ் நிறுவன ஊழியர்கள் கரூர் மாவட்டம் முழுவதும் அடாவடி வசூல் வேட்டை நடத்தி பொதுமக்களுக்குப் பல்வேறு இடையூறுகளைக் கொடுத்துவருகின்றனர்.

கரூர்:கேரளாவைத் தலைமையிடமாகக் கொண்ட மணப்புரம் ஃபைனான்ஸ் நிறுவனத்தின்கீழ் இயங்கும் ஆசீர்வாதம் மைக்ரோ பைனான்ஸ் நிறுவன ஊழியர்கள் கரூர் மாவட்டம் முழுவதும் அடாவடி வசூல் வேட்டை நடத்தி பொதுமக்களுக்குப் பல்வேறு இடையூறுகளை கொடுத்துவருகின்றனர்.

ஊரடங்கால் வேலை இழப்பு காரணமாக பொருளாதாரச் சிக்கல்களை நடுத்தர குடும்பத்தினர் சந்தித்துவருகின்றனர். சின்ன ஆண்டாங்கோவில் பகுதியைச் சேர்ந்த 10 பேர் கொண்ட மகளிர் குழு ஆசீர்வாதம் மைக்ரோ பைனான்ஸ் நிறுவனத்திடம் தலா ரூ.50,000 கடன் பெற்றுள்ளனர்.

கடன் தொகைக்கு 26 மாத தவணையாக மாதம் ஒன்றுக்கு ரூ.2,600 வசூல் செய்யப்பட்டுவந்துள்ளது. ஊரடங்கு காரணமாக வேலை இழப்பைச் சந்தித்துள்ள சுய உதவிக்குழு பெண்களிடம் கடந்த மாதம் தவணையைக் கேட்டு நிறுவன ஊழியர்கள் நாள்தோறும் தொந்தரவு அளித்துவருகின்றனர்.

ஊரடங்கு உத்தரவால் குழுவில் உள்ள பெண்கள் தங்கள் நிலையைக் கூறி எடுத்துரைத்துள்ளனர். ஆனாலும் தவணை கட்டவில்லை என்றால் ஒவ்வொருவரும் ரூ.950 வட்டி கட்ட வேண்டும் எனவும் கூறியுள்ளனர். வட்டி அதிகபட்சமாக உள்ளது என அவர்கள் கேள்வி கேட்டபோது, வாக்குவாதம் செய்வதுடன் அண்டை வீட்டார் முன்னிலையில் அவமானப்படுத்துவதாகப் பாதிக்கப்பட்ட பெண்கள் தெரிவித்தனர்.

மேலும் வட்டியை கட்டவில்லை என்றால் அடுத்த மாதம் இன்னும் கூடுதலாக வட்டித்தொகை வரும் எனவும் பகிரங்கமாக மிரட்டல் விடுத்ததுடன், மீறினால் எந்த வங்கியிடமும் கடன் பெற முடியாத அளவிற்கு நடவடிக்கை மேற்கொள்ளப்படும் என அம்மக்களை அச்சுறுத்தியுள்ளனர்.

இது குறித்து கரூரைச் சேர்ந்த சமூக செயற்பாட்டாளர் உதயகுமார் கூறுகையில், கரூர் மாவட்டம் முழுவதும் பல்வேறு கிராமங்களில் இதேநிலை தொடர்ந்து வருவதால் மாவட்ட ஆட்சியர் தலையிட்டு, நிதி நிறுவன ஊழியர்கள் கட்டாய வசூல் மேற்கொள்வது குறித்து கால அவகாசம் வழங்க நடவடிக்கை மேற்கொள்ள வேண்டும்.

கடன் வசூல் செய்ய அடாவடி மேற்கொள்ளும் நிறுவனங்கள் மீது புகார் அளிக்க தொலைபேசி எண் அறிவிக்க வேண்டும். தமிழ்நாடு நிதியமைச்சர், ஒன்றிய அரசு நிதியமைச்சர் தலையிட்டு கடன் பிரச்சினையால் பாதிக்கப்படும் எளிய மக்களின் நலன் காக்க உரிய உத்தரவைப் பிறப்பிக்க வேண்டும் எனத் தெரிவித்துள்ளார்.