காட்டு யானை தாக்கியதில் ஒருவர் உயிரிழப்பு - யானையைப் பிடிக்க மனிதச் சங்கிலி போராட்டத்தில் குதித்த மக்கள்!

கோயம்புத்தூர்: பொள்ளாச்சி அருகே ஆழியார் நவமலைப்பகுதியில் ஒற்றைக் காட்டு யானை தாக்கியதில் ஒருவர் உயிரிழந்தார். எனவே, கூண்டு வைத்து யானையைப் பிடிக்க வேண்டும் என பொது மக்கள் சங்கலி போராட்டத்தில் ஈடுபட்டு வருகின்றனர்.

கோயம்புத்தூர் மாவட்டம் பொள்ளாச்சி அருகே உள்ள ஆழியார் நவமலைப்பகுதியில் ஒற்றைக் காட்டு யானை, மலைவாழ் மக்கள் குடியிருப்புக்குள் புகுந்து அட்டகாசம் செய்து வந்துள்ளது.

இந்நிலையில், கடந்த சில தினங்களாக அந்த ஒற்றைக் காட்டு யானை, வனப்பகுதியில் இருந்து வெளியேறி அர்த்தனாரி பாளையம் கிராமத்தில் விவசாய தோட்டங்களுக்குள் புகுந்து, தென்னை, வாழை உள்ளிட்ட பயிர்களைச் சேதப்படுத்தியதோடு விவசாயி ராதாகிருஷ்ணன் என்பவரையும் தாக்கியதில், அவர் சம்பவ இடத்திலேயே உயிரிழந்தார்.

மேலும், இன்று அதிகாலை அதே பகுதியைச் சேர்ந்த மூதாட்டியை காட்டு யானை துதிக்கையால் தூக்கி வீசியுள்ளது. இதில் படுகாயமடைந்த மூதாட்டியை மீட்டு பொள்ளாச்சி அரசு மருத்துவமனைக்கு வனத் துறையினர் அனுப்பி வைத்தனர்.

காட்டு யானையின் அட்டகாசத்தை தாங்க முடியாத பொதுமக்கள் அந்த யானையை, உடனடியாகக் கூண்டு வைத்து பிடிக்க வேண்டும் என நா.மூ. சுங்கம் என்னும் பகுதியில் மனிதச் சங்கலி போராட்டத்தில் ஈடுபட்டும் வாகனங்களை சிறைப் பிடித்தும் வருகின்றனர்.

மேலும், மறியல் நடக்கும் இடத்திற்கு வால்பாறை சட்டமன்ற உறுப்பினர் கஸ்தூரி வாசு, வருவாய்த் துறையினர், காவல் துறையினர் பொதுமக்களிடம் பேச்சுவார்த்தை நடத்தி வருகின்றனர்.

இதையடுத்து, காட்டு யானையைப் பிடிக்க, வனத் துறையினர் கோவை சாவடி பகுதியிலிருந்தும் டாப்-சிலிப் கோழிகுத்தி முகாமிலிருந்தும் கலீம், மாரியப்பன், சுயம்பு ஆகிய மூன்று கும்கி யானைகளை வரவழைக்கத் திட்டமிட்டுள்ளனர்.

மேலும், கால்நடை மருத்துவர்களுக்கும் தகவல் அளிக்கப்பட்டு இரண்டு மூன்று தினங்களுக்குள் அந்த காட்டு யானையைப் பிடித்து, களியாறு முகாமில் கூண்டில் அடைக்க என வனத் துறையினர் முயற்சிகள் மேற்கொண்டுள்ளனர்.

இதையும் படிங்க : சாலையில் சுற்றித்திரியும் ஒற்றை காட்டு யானை: வாகன ஓட்டிகள் பீதி!