திமுக சட்டப்பேரவை உறுப்பினர் கு.க. செல்வம் ஆகஸ்ட் 4ஆம் தேதி பாஜக தேசியத் தலைவர் ஜே.பி.நட்டாவை டெல்லியில் சந்தித்து பேசினார். அடுத்த நாள் கமலாலயத்தில் நடைபெற்ற ராமர் பூஜையில் காவித் துண்டு அணிந்து பங்கேற்றார். இதனைத் தொடர்ந்து திமுக தலைவர் ஸ்டாலின், சட்டப்பேரவை உறுப்பினர் கு.க. செல்வம் கட்சிக்கு அவப்பெயர் ஏற்படுத்தும் வகையில் செயல்படுவதால், அவரை கட்சியிலிருந்து தற்காலிகமாக நீக்கி வைப்பதோடு, ஏன் அடிப்படை உறுப்பினர் பதவியில் இருந்து நீக்கக்கூடாது என விளக்கம் கேட்டு அறிவிப்பு ஒன்றை வெளியிட்டிருந்தார்.
இதையடுத்து கு.க. செல்வம் விளக்கம் ஏற்புடையதாக இல்லாததால், அவரை திமுகவின் அடிப்படை உறுப்பினர் உள்ளிட்ட அனைத்து பொறுப்பிகளில் இருந்தும் நிரந்தரமாக நீக்குவதாக திமுக தலைமை நேற்றைய (ஆக.13) தினம் அறிவிப்பு வெளியிட்டிருந்தது. இந்நிலையில் இன்று (ஆக. 14) சென்னை நுங்கம்பாக்கத்தில் உள்ள ஆயிரம் விளக்கு சட்டப்பேரவை தொகுதி அலுவலகத்தில் கு.க. செல்வம் செய்தியாளர்களைச் சந்தித்தார்.