கரோனாவை கட்டுப்படுத்துவது நமது தேசியக் கடமை : சைலேந்திரபாபு ஐபிஎஸ்

சென்னை: கரோனாவை கட்டுப்படுத்துவது நமது தேசிய கடமை; இதற்கு மக்கள் முயற்சி செய்ய வேண்டுமென தமிழ்நாடு தீயணைப்பு மற்றும் மீட்பு துறையின் டிஜிபி சைலேந்திரபாபு ஐபிஎஸ் வலியுறுத்தியுள்ளார்.

இந்தியாவில் கரோனா இரண்டாம் அலை உச்சத்தில் இருக்கிறது. தினந்தோறும் 4 லட்சத்துக்கும் அதிகமானோர் கரோனா தொற்றால் பாதிக்கப்படுகின்றனர். தற்போது விலங்குகளுக்கும் கரோனா பாதிப்பு கண்டறியப்பட்டு வருகிறது. இந்நிலையில், கரோனாவை கட்டுப்படுத்துவது நமது தேசிய கடமை; இதற்கு மக்கள் முயற்சி செய்ய வேண்டுமென தமிழ்நாடு தீயணைப்பு மற்றும் மீட்பு துறையின் டிஜிபி சைலேந்திரபாபு வலியுறுத்தியுள்ளார்.

இது தொடர்பாக அவர் வெளியிட்டுள்ள வீடியோவில், “சிறு குழந்தைகளுக்கு கரோனா வராது என அலட்சியமாக இருக்க வேண்டாம். மூன்றாம் அலையில் வருவதற்குகூட வாய்ப்புள்ளது. எனவே மிகவும் எச்சரிக்கையாக இருக்கவேண்டும். வீட்டை விட்டு வெளியே செல்ல வேண்டாம். குறிப்பாக திருமணத்திற்கும், நண்பர்களைச் சந்திக்கவும் வெளியே செல்ல வேண்டாம். கரோனா தடுப்பூசி செலுத்திக்கொள்வது நல்லது.

ஏதாவது தவிர்க்க முடியாத காரணத்திற்காக வெளியே சென்றால் தகுந்த இடைவெளி, முகக்கவசம் கட்டாயமாக அணிந்திருக்க வேண்டும். சிலர் முகக்கவசத்தை சரியாக அணிவதில்லை; சிலர் பேசும்போது முகக்கவசம் அணிவதில்லை; இதையெல்லாம் பார்க்கும்போது வருத்தமாக உள்ளது. வீட்டில் இருக்கும்போது கூட முகக்கவசம் அணிந்து இருக்க வேண்டும்.

ஒருவேளை கரோனாவால் பாதிக்கப்பட்டால் வீட்டில் தனிமைப்படுத்திக்கொள்ளவும். சமுதாயம் சிறப்பாக இருக்க வேண்டும் என்று நினைத்து தனிமைப்படுத்திக்கொள்ள வேண்டும். கரோனாவை கட்டுப்படுத்துவது நமது தேசிய கடமை, உலக சமுதாயத்திற்கு செய்கின்ற கடமை. எனவே தொடர்ந்து கரோனாவை கட்டுப்படுத்த முயற்சி செய்ய வேண்டும்” என குறிப்பிட்டுள்ளார்.

இதையும் படிங்க:'நேற்று தொடக்கம்; இன்று நிறுத்தம்' ரெம்டெசிவருக்கு அலையும் மதுரைவாசிகள்