‘வேளாண்மைப் பல்கலைக்கழகத்தில் ஜூலை 15ஆம் தேதி முதல் வகுப்பு தொடங்கப்படும்’ - துணைவேந்தர் கீதாலட்சமி

தமிழ்நாடு வேளாண்மைப் பல்கலைக்கழகத்தில் உள்ள பட்டப்படிப்புகளில் மாணவர்கள் சேர்க்கை 2023-24ஆம் கல்வியாண்டில் முதற்கட்டக் கலந்தாய்வு முடித்து, ஜூலை 15ஆம் தேதி முதல் முதலாம் ஆண்டு மாணவர்களுக்கான வகுப்புகள் தொடங்கப்படும் என அதன் துணைவேந்தர் கீதாலட்சுமி தெரிவித்தார்.

சென்னை:தமிழ்நாடு வேளாண்மைப் பல்கலைக் கழகத்தின் துணைவேந்தர் கீதா லட்சுமி சென்னையில் நமது ஈடிவி பாரத் ஊடகத்திற்கு பிரத்தியேக பேட்டி அளித்துள்ளார். அதில், “தமிழ்நாடு வேளாண்மைப் பல்கலைக் கழகத்தில் நடப்பாண்டில் சேர்வதற்கு 40ஆயிரம் மாணவர்கள் விண்ணப்பித்தனர். வேளாண்மைப்படிப்புகளில் 6ஆயிரத்து 600 இடங்கள் உள்ளது. அதில், பல்கலைக் கழகம் மற்றும் அரசுக் கல்லூரிகளில் 100 சதவீதம் இடங்களும், பல்கலைக் கழகத்தின் இணைப்புப்பெற்ற சுயநிதிக்கல்லூரிகளில் ஐசிஎஸ்ஆர் அங்கீகாரம் பெற்றக்கல்லூரிகளில் அனைத்து இடங்களும் நிரம்பியுள்ளது.

டயர் 2 கல்லூரிகளில் மாணவர்கள் சேர்க்கை குறைவாக உள்ளது. அந்தக் கல்லூரிகளிலும் அரசின் ஒதுக்கீட்டு இடங்களான 65 சதவீதம் இடங்கள் நிரப்பப்பட்டுள்ளது. நிர்வாக ஒதுக்கீட்டில் உள்ள 35 சதவீதம் இடங்களுக்கு நேரடியாக மாணவர் சேர்க்கை 2 கட்டமாக நடத்தப்பட்டுள்ளது. மேலும், 2 கட்டமாக நேரடியாக மாணவர்கள் சேர்க்கை கலந்தாய்வு 4 நாட்களில் நடத்தப்பட்டு, வரும் மாணவர்களைச் சேர்த்து விடுவோம்.

வேளாண்மைப் படிப்புகளில் நடப்பாண்டில் சேர்ந்த மாணவர்களுக்கான முதலாம் ஆண்டு வகுப்புகள் பொங்கல் பண்டிகைக்குப் பின்னர் தான் தொடங்கப்பட்டுள்ளது. மாணவர்களுக்கு முதலில் புத்தாக்க வகுப்புகள் நடத்தப்பட்டன. அதன் பின்னர் பிப்ரவரி 1ஆம் தேதி முதல் தான் வகுப்புகள் தொடங்கப்பட்டு நடைபெற்று வருகிறது. அகில இந்திய அளவிலும் வேளாண்மை படிப்புகள் தற்பொழுது தான் தொடங்கப்பட்டுள்ளது.

வேளாண்மைப்படிப்புகளில் மாணவர்கள் சேர்க்கையை 2023-24ஆம் கல்வியாண்டில் அதிகரிக்கவும், முன்கூட்டியே முடிக்கவும் புதியத் திட்டத்தை செயல்படுத்தவுள்ளோம். பல்கலைக் கழகத்தின் கல்வி மன்றக்குழுவின் கூட்டத்தில் முடிவு எடுக்கப்பட்டுள்ளது. அதன்படி 12ஆம் வகுப்பு மாணவர்களுக்கான தேர்வுகள் முடிவுகள் வெளியிடப்பட்டவுடன், விண்ணப்பங்கள் ஆன்லைன் மூலம் ஒரு மாதம் பெறப்படும். அதனைத்தொடர்ந்து தரவரிசைப் பட்டியல் தயார் செய்து அறிவிக்கப்படும்.

அதன்பின்னர் ஜூன் 15ஆம் தேதிக்கு பின்னர் மாணவர் சேர்க்கை கலந்தாய்வினை தொடங்கப்படும். ஜூலை மாதம் 15ஆம் தேதி முதலாம் ஆண்டு மாணவர்களுக்கான கல்லூரி வகுப்புகள் தொடங்கப்படும். அதன் பின்னர் வரும் மாணவர்களும் சேர்வதற்கான வாய்ப்பும் அளிக்கப்படும். அவர்களுக்குக் குறிப்பிட்ட நாளில் வகுப்புகளைத் தொடங்கி, பாடத்தை நடத்தி, அவர்கள் முதலாம் பருவத்திற்கான தேர்வினை மற்ற மாணவர்களுடன் இணைந்து எழுதும் வகையில் ஏற்பாடு செய்யப்படும். இது போன்ற நடவடிக்கையால் நன்றாக படிக்கும் மாணவர்களும் அதிகளவில் சேர்வார்கள்.

வரும் கல்வியாண்டில் சிறப்பாக செயல்படுத்தி விடுவோம். அதனால் வரும் காலங்களில் தொடர்ந்து இந்த நடைமுறைப் பின்பற்றப்படும். இதனால் மாணவர்கள் அதிகளவில் சேர்வார்கள். மாணவர்கள் விண்ணப்பம் செய்வது , கலந்தாய்வு உள்ளிட்ட பணிகள் ஆண்லைன் மூலம் நடைபெற்றாலும் ,கட்டணங்களைச் செலுத்தவும், சான்றிதழ் சரிபார்க்கவும் நேரடியாக வர வேண்டும். கலந்தாய்வின் போது இடங்களை மாணவர்களே தான் தேர்வு செய்கின்றனர்.

தரவரிசைப் பட்டியல் அடிப்படையில் தேர்வுசெய்ய முடியும். இதில் யாரும் எதுவும் செய்ய முடியாது. திறந்த முறையில் கலந்தாய்வு நடத்தப்படும். தமிழ்நாடு வேளாண்மைப் பல்கலைக் கழகத்தில் 18 அரசுக் கல்லூரியும், 28 தனியார் கல்லூரியும் உள்ளது. புதியதாகக் கல்லூரிகள் தொடங்குவது அரசு தான் முடிவு செய்ய வேண்டும். அரசு புதியதாக கல்லூரிகளை தொடங்க வேண்டும் எனக் கருதி அறிவித்தால், அதற்கு நாங்கள் தயாராக இருக்கிறோம்” எனத் தெரிவித்தார்.

இதையும் படிங்க:நாட்டு நலப்பணித் திட்டத்தின் மூலம் கிராமத்தில் விழிப்புணர்வு நிகழ்ச்சிகள் நடத்திய கல்லூரி மாணவிகள்!