சென்னை:தமிழ்நாட்டில் பன்னிரண்டாம் வகுப்பு மாணவர்களுக்கான ஆங்கில மொழிதாள் தேர்விற்கு பதிவு செய்த பள்ளி மாணவர்கள் மற்றும் தனித்தேர்வர்களில் சுமார் 49,500 பேர் தேர்வு எழுத வருகை தரவில்லை என்ற தகவல் வெளியாகியுள்ளது. தமிழ்நாட்டில் பன்னிரண்டாம் வகுப்பு மாணவர்களுக்கான பொதுத் தேர்வு 13ஆம் தேதி தொடங்கி ஏப்ரல் 3ஆம் தேதி வரை நடைபெறுகிறது.
முதல் நாள் 13 மொழி பாடங்களுக்கான தேர்வு நடைபெற்றது. இந்தத் தேர்வினை எழுதுவதற்கு பள்ளிகளில் படித்த மாணவர்கள் 8 லட்சத்து 51 ஆயிரத்து 303 பேர் பதிவு செய்திருந்தனர். அவர்களில் 8 லட்சத்து ஆயிரத்து 744 பேர் மட்டுமே தேர்வினை எழுதியுள்ளனர். மீதமுள்ள 49.599 மாணவர்கள் தேர்விற்கு வரவில்லை. அதேபோல் தனித்தேர்வர்களாக 8 ஆயிரத்து 901 பேர் பதிவு செய்திருந்தனர்.
அவர்களில் 7 ஆயிரத்து 786 பேர் தேர்வினை எழுதியுள்ளனர். மீதமுள்ள 1,115 மாணவர்கள் தேர்விற்கு வரவில்லை. தேர்விற்கு விண்ணப்பித்திருந்தும் தேர்வு எழுதவில்லை என்பதால் பெரும் சர்ச்சையை கிளப்பியது. இந்த நிலையில் 12ஆம் வகுப்பு மாணவர்களுக்கான ஆங்கிலத் தேர்வினை எழுதவும் சுமார் 49, 500 பேர் வரவில்லை என்ற தகவல் வெளியாகி உள்ளது.