இந்திய கால்பந்து கூட்டமைப்பின் சார்பில் நடத்தப்படும், சூப்பர் கோப்பை கால்பந்து தொடரின் பிராதன சுற்றுப்போட்டிகள் இன்று தொடங்குகின்றன. இந்த தொடரில் இந்தியன் சூப்பர் லீக்(ஐஎஸ்எல்) கால்பந்து மற்றும் ஐ-லீக் தொடர்களில் ஆடிய கிளப் அணிகள் பங்குபெறும்.
ஐ-லீக் தொடரில் நடப்பு சாம்பியனாக இருந்துவரும் சென்னை அணி உள்ளிட்ட சில ஐ-லீக் கிளப் அணிகள், இந்திய கால்பந்து கூட்டமைப்பு தங்களை முறையாக நடத்தவில்லை என்பதால், இந்த வருடம் சூப்பர் கோப்பை தொடரில் பங்கேற்கப்போவதில்லை என அறிவித்திருந்தது.
இந்நிலையில், இன்று புவனேஷ்வரில் நடைபெறும் பிரதான சுற்றின் முதல் போட்டியில் ஐஎஸ்எல் தொடர்களில் ஆடிய சென்னையின் எப்சி, மும்பை அணிகள் பலபரீட்சை செய்ய உள்ளன.
சென்னையின் எப்சி அணி சமீபத்தில் நடந்து முடிந்த ஐஎஸ்எல் கால்பந்து தொடரில் இறுதி இடத்தை பிடித்து ரசிகர்களுக்கு ஏமாற்றத்தை அளித்தது. ஆனால், மும்பை அணி அரையிறுதிப்போட்டி வரை சென்று அசத்தியது. இரண்டு ஐஎஸ்எல் அணிகள் போட்டி என்பதால் இன்றைய போட்டி ரசிகர்கள் மத்தியில் மிகுந்த எதிர்பார்ப்பை உண்டாக்கியுள்ளது.
இதுகுறித்து சென்னை அணியின் பயிற்சியாளர் ஜான் கிரிகோரி கூறுகையில்,
நடந்து முடிந்த ஐஎஸ்எல் கால்பந்து தொடர் எங்களுக்கு பெரிய ஏமாற்றத்தையே அளித்தது. ஏனெனில், அதற்கு முந்தைய தொடரில் சாம்பியன் பட்டத்தை வென்ற எங்கள் அணி, இம்முறை புள்ளிப்பட்டியலில் கடைசி இடத்தோடு திரும்பியது. எனவே இந்த தொடரில் வெற்றி பெறும் நோக்கில் எங்கள் அணி வீரர்கள் பயிற்சியில் ஈடுபட்டுள்ளனர் என அவர் தெரிவித்தார்.
