12ஆவது ஐபிஎல் தொடரின் 33ஆவது லீக் போட்டியில் சென்னை - ஹைதராபாத் அணிகள் மோதின. இதில் டாஸ் வென்ற சென்னை அணி கேப்டன் ரெய்னா பேட்டிங்கைத் தேர்வு செய்தார். முதல் பேட்டிங் ஆடிய சென்னை அணி 5 விக்கெட்டுகளை இழந்து 132 ரன்கள் சேர்த்தது.
இதனையடுத்து 133 ரன்கள் எடுத்தால் வெற்றி என்ற இலக்குடன் ஹைதராபாத் அணியின் தொடக்க வீரர்களாக வார்னர் - பெயர்ஸ்டோவ் இணை களமிறங்கியது. இந்த இணை பவர்-பிளேயில் சென்னை அணியின் பந்துவீச்சை சிக்சரும் பவுண்டரியுமாக வெளுத்து வாங்கியது. வார்னர் 24 பந்துகளில் அரைசதத்தை கடந்து ருத்ர தாண்டவம் ஆடினார். இதனையடுத்து சாஹர் வீசிய பந்தில் 25 பந்துகளில் 50 ரன்கள் எடுத்து வெளியேறினார்.
இதனையடுத்து களமிறங்கிய கேப்டன் வில்லியம்சன் 3 ரன்களில் ஆட்டமிழக்க, ஹைதராபாத் அணி 7 ஓவர்களுக்கு 2 விக்கெட்டுகளை இழந்து 71 ரன்கள் எடுத்திருந்தது. பின்னர் விஜய் சங்கர் களமிறங்கி நிதானமாக ஆட, ஒருமுனையில் விக்கெட்டுகள் சரிந்தாலும் மறுமுனையில் பெயர்ஸ்டோவ் சிக்சர்களாக அடித்து நொறுக்கினார்.
பின்னர் நிதானமாக ஆடிய விஜய் சங்கர் 7 ரன்கள் மட்டுமே எடுத்து பெவிலியன் திரும்பினார். தொடர்ந்து சிறப்பாக ஆடிய பெயர்ஸ்டோவ் அரைசதம் கடந்தார். பின்னர் ஹூடா - பெயர்ஸ்டோவ் இணை நிதானமான ஆட்டத்தை வெளிப்படுத்தியது.
ஹைதராபாத் அணி வெற்றிபெற கடைசி 24 பந்துகளில் 9 ரன்கள் மட்டுமே தேவைப்பட்டது. இதனையடுத்து கரண் ஷர்மா வீசிய அடுத்த ஓவரின் முதல் மூன்று பந்துகளில் 7 ரன்கள் எடுக்கப்பட்டது. வெற்றிக்கு 2 ரன்கள் மட்டுமே தேவைப்பட்ட நிலையில் ஹூடா ஆட்டமிழக்க, அடுத்த பந்தில் சிக்சர் அடித்து ஹைதராபாத் அணியை பெயர்ஸ்டோவ் வெற்றிப்பாதைக்கு அழைத்துச் சென்றார். ஹைதராபாத் அணி 16.5 பந்துகளில் 4 விக்கெட்டுகளை இழந்து 137 ரன்கள் எடுத்து 6 விக்கெட்டுகள் வித்தியாசத்தில் சென்னை அணியை வீழ்த்தியது. இறுதிவரை ஆட்டமிழக்காத பெயர்ஸ்டோவ் 44 பந்துகளில் 61 ரன்கள் எடுத்து ஹைதராபாத் அணியின் வெற்றிக்கு முக்கியப் பங்கு வகித்தார்.
