மும்பை: உலகக் கோப்பை 39வது லீக் ஆட்டத்தில் ஆஸ்திரேலியா அணியும் ஆப்கானிஸ்தான் அணியும் மோதியது. இந்த போட்டி மும்பை வான்கடே மைதானத்தில் நடைபெற்றது. டாஸ் வென்ற ஆப்கானிஸ்தான் அணி பேட்டிங் தேர்வு செய்தது. முதல் விக்கெட்டுக்கு 38 ரன்கள் சேர்த்த நிலையில், குர்பாஸ் 21 ரன்களுக்கு அவுட்டானார். அடுத்துக் களமிறங்கிய ரஹ்மத் சத்ரானுடன் ஜோடி சேர்ந்து நிலைத்து நின்று ஆடினார்.
ஆப்கானிஸ்தான் 121 ரன்கள் எடுத்திருந்த போது ரஹ்மத் 30 ரன்களுக்கு அவுட்டானார். அடுத்து வந்த சஹிதி ஸ்டார்க் பந்தில் 26 ரன்களுக்கு அவுட்டானார். ஒரு பக்கம் விக்கெட் விழுந்தாலும் சத்ரான் தூணாக நின்றார். 143 பந்துகளில் 129 ரன்கள் எடுத்தார். உலகக் கோப்பையில் சதம் அடித்த முதல் ஆப்கானிஸ்தான் வீரர் என்ற சாதனை படைத்தார்.
மறுபக்கம் அசமத்துல்லா 22, நபி 12 சத்ரானுக்கு நல்ல கம்பெனி கொடுத்தனர். கடைசி நேரத்தில் ரஷித் கான் நாலா பக்கமும் பவுண்டரிகளாக சிதறடித்தார். ரஷித் கான் 18 பந்துகளில் 35 ரன்கள் எடுத்தார். 292 எடுத்தால் வெற்றி என்ற இலக்குடன் களமிறங்கிய ஆஸ்திரேலியா அணிக்கு ஆரம்பமே அதிர்ச்சி காத்திருந்தது. டிராவிஸ் ஹெட் ரன் எடுக்காமல் அவுட்டானார். அடுத்துக் களமிறங்கிய மார்ஷ் சற்று நேரம் தாக்குப்பிடித்த நிலையில் நவீன் உல் ஹக்கின் அபார பந்திவீச்சில் எல்பிடபில்யூ முறையில் அவுட்டானார்.