இந்திய கிரிக்கெட் அணியின் முன்னாள் வீரர் சச்சின் டெண்டுல்கர் 1989 முதல் 2013 வரை கிரிக்கெட்டில் பல்வேறு சாதனைகளை படைத்துள்ளார். ரசிகர்களால் கிரிக்கெட்டின் கடவுள் என அழைக்கப்படும் இவருக்கும் அஞ்சலிக்கும் மே 25, 1995இல் திருமணமானது. இந்த தம்பதிக்கு சாரா டெண்டுல்கர் என்ற மகளும், அர்ஜூன் டெண்டுல்கர் என்ற மகனும் உள்ளனர்.
இந்த நிலையில், இவர்களுக்கு திருமணமாகி நேற்றொடு 25 ஆண்டுகள் நிறைவடைந்தன. இதைக் கொண்டாடும் விதமாக, சச்சின் நேற்று தனது குடும்பத்தினருக்கு தன் கையால் தயார் செய்த மாம்பழ குல்ஃபி செய்து சர்ப்ரைஸ் தந்தார். தனது 25ஆவது திருமண நாளன்று மாம்பழ குல்ஃபி செய்யும் வீடியோவை இன்ஸ்டாகிராம் பக்கத்தில் வெளியிட்டுள்ளார்.