ஹைதராபாத்: விஜய் தேவரகொண்டா நடிப்பில் உருவாகியிருக்கும் 'வேர்ல்டு ஃபேமஸ் லவ்வர்' படத்தின் டீஸரை படக்குழுவினர் வெளியிட்டுள்ளனர்.
தெலுங்கு சினிமாவில் வளர்ந்து வரும் கதாநாயகனாக இருந்து வருகிறார் விஜய் தேவரகொண்டா. இவர் நடித்து வரும் புதிய படமான 'வேர்ல்டு ஃபேமஸ் லவ்வர்'. படம் குறித்து கடந்த ஆண்டு அக்டோபரில் அறிவிக்கப்பட்டது.
இந்தப் படத்தில் விஜய் தேவரகொண்டாவுக்கு ஜோடியாக ராஷி கண்ணா, கேத்ரின் தெரசா, இஸபெல்லே லெய்ட், ஐஸ்வர்யா ராஜேஷ் என நான்கு கதாநாயகிகள் நடித்துள்ளனர். காதல் கலந்த எமோஷனல் ட்ராமா பாணியில் உருவாகியிருக்கும் படத்தை கிராந்தி மாதவ் இயக்கியுள்ளார்.
இந்தப்படம் காதலர் தின ஸ்பெஷலாக பிப்ரவரி 14ஆம் தேதி வெளியாகும் என அறிவிக்கப்பட்டுள்ள நிலையில், தற்போது படத்தின் டீஸர் படக்குழுவினரால் வெளியிட்டப்பட்டுள்ளது.
விஜய் தேவரகொண்டாவை பிரபலப்படுத்திய 'அர்ஜுன் ரெட்டி' பட பாணியில் காதல், வலி, கோபம் போன்ற உணர்ச்சிகள் கொப்பளிக்கும் விதமாக 'வேர்ல்டு ஃபேமஸ் லவ்வர்' படத்தின் டீஸரும் அமைந்துள்ளது.
ஒரு நிமிடம் 13 விநாடிகள் ஓடும் டீஸரில் விஜய் தேவரகொண்டா நான்கு நாயகிகளை காதலிப்பதும், அவர்களிடம் மிக நெருக்கமான உறவில் இருப்பதும் காட்டப்பட்டுள்ளது. இதில், பைலட், சுரங்கத் தொழிலாளி, கோபக்கார இளைஞர் உள்ளிட்ட கேரக்டர்களில் தோன்றுகிறார் விஜய் தேவரகொண்டா. ஐஸ்வர்யா ராஜேஷ் குடும்பத்தலைவி கேரக்டரில் நடித்துள்ளார்.
தெலுங்கு சினிமா ரசிகர்களால் பெரிதும் எதிர்பார்க்கப்படும் இந்தப் படத்தில், விஜய் தேவரகொண்டாவின் கேரக்டரில் 'அர்ஜுன் ரெட்டி' பட சாயல் இருப்பதாக பலர் கருத்து தெரிவித்து வருகின்றனர்.