விமானப்படையின் தடையில்லா சான்றிதழ்: 'சூரரைப்போற்று' ட்ரெய்லர் வெளியிட முடிவு

சென்னை: சூர்யா நடிப்பில் உருவாகியுள்ள 'சூரரைப்போற்று' படத்திற்கு இந்திய விமானப்படை தடையில்லா சான்றிதழ் அளித்ததையடுத்து படத்தின் ட்ரெய்லரை வெளியிட படக்குழுவினர் முடிவு செய்துள்ளனர்.

'இறுதிச்சுற்று' படத்துக்குப் பிறகு, சுதா கொங்கரா இயக்கியுள்ள திரைப்படம் 'சூரரைப்போற்று'. இப்படத்தில் நடிகர் சூர்யா, அபர்ணா பாலமுரளி ஆகியோர் முன்னணி கதாபாத்திரங்களை ஏற்றுள்ளனர். நடிகர் சூர்யாவும், குனீத் மோங்காவும் இணைந்து இப்படத்தை தயாரித்துள்ளனர்.

'ஏர் டெக்கான்' என்ற விமான நிறுவனத்தின் நிறுவனர் கேப்டன் ஜி.ஆர். கோபிநாத்தின் வாழ்க்கையில் நடந்த நிகழ்வுகள், போராட்டங்களை அடிப்படையாகக் கொண்ட படமாக 'சூரரைப்போற்று' தயாராகியுள்ளது.

ரசிகர்கள் மத்தியில் பெரிதும் எதிர்பார்ப்பை ஏற்படுத்திய இந்தப்படம், அமேசான் ப்ரைம் ஓடிடி தளத்தில் அக்டோபர் 30ஆம் தேதி நேரடியாக வெளியாகும் என அறிவிக்கப்பட்டிருந்தது.

படத்தில் சில காட்சிகள் இந்திய விமானப் படை குறித்து இருந்ததை அடுத்து விமானப்படையில் இருந்து தடையில்லா சான்றிதழ் கிடைக்க தாமதமானது. இதனால் படம் அறிவித்தபடி வெளியாகாது எனப் படக்குழுவினர் அறிவித்திருந்தனர்.

தற்போது இந்திய விமானப்படையில் இருந்து படம் வெளியிட தடையில்லா சான்றிதழ் கிடைத்துள்ளது. இதனை அடுத்து படத்தை தீபாவளிக்கு வெளியிட படக்குழுவினர் முடிவு செய்துள்ளனர்.

அந்த வகையில், அக்டோபர் 26ஆம் தேதி இப்படத்தின் ட்ரெய்லர் வெளியாகும் என நடிகர் சூர்யா தெரிவித்துள்ளார்.