'நீங்கள் பேனர் வைத்துதான் உங்களை வெளிப்படுத்த வேண்டுமென்று அவசியமில்லை' - நடிகர் சூர்யா

சென்னை: நீங்கள் பேனர் வைத்துதான் உங்களை எனக்கு வெளிப்படுத்த வேண்டுமென்ற அவசியமில்லை என காப்பான் திரைப்படத்தின் பத்திரிகையாளர் சந்திப்பில் நடிகர் சூர்யா கூறியுள்ளார்.

கே.வி.ஆனந்த் இயக்கத்தில் சூர்யா நடித்து வெளிவரவிருக்கும் காப்பான் திரைப்படத்தின் பத்திரிகையாளர் சந்திப்பு நேற்று சென்னை, தனியார் ஹோட்டல் ஒன்றில் நடைபெற்றது. இதில், இயக்குனர் கே.வி.ஆனந்த், நடிகர் சூர்யா, சமுத்திரக்கனி, தலைவாசல் விஜய், நடிகை சாயிஷா உள்ளிட்டோர் கலந்துகொண்டனர்.

அப்போது நடிகர் சூர்யா பேசுகையில், ’எந்த புதுப்படம் வெளியானாலும் கொண்டாட்டங்கள் இருக்கும். ஆனால் சமூகத்தில் என்ன நடக்கிறது என்று அறிந்து கொண்டு நாம் செயல்பட வேண்டும்.

என் ரசிகர்களுக்கு ஒரு வேண்டுகோள், நீங்கள் பேனர் வைத்துதான் உங்கள் விஸ்வாசத்தை எனக்கு புரியவைக்க வேண்டும் என்பதில்லை. நீங்கள் செய்யும் ரத்த தானம், ஏழைக் குழந்தைகளுக்கு செய்யும் கல்வி உதவி இதெல்லாம் எனக்கு தெரியும். எனவே, இனி என திரைப்படங்களுக்கு பேனர் வைக்கவேண்டாம்’ என்றார்.