தனது செல்லநாய் இறந்ததன் மர்மத்தை கண்டுபிடிக்குமாறு துப்பறிவாளனான தன்னை நாடிய சிறுவனுக்கு உதவ முற்படும் கணியன் பூங்குன்றன், அதன் பின்னணியில் இருக்கும் கேங்கும், அவர்களின் பித்தலாட்டங்களும் என விரியும் விதமாக அமைந்திருந்த துப்பறிவாளன் படம் ரசிகர்களுக்கு சிறந்த சீட் எட்ஜ் த்ரில்லராக புதிய அனுபவத்தை தந்தது. இந்தப் படம் ஹாலிவுட் சூப்பர் ஹிட் படமான ஷேர்லாக் ஹோம்ஸ் கதாபாத்திர பாணியில் அமைந்திருப்பதாகக் கூறி நன்றி கார்டு படத்தின் தொடக்கத்தில் போடப்பட்டது.
2017ஆம் ஆண்டு சஸ்பென்ஸ் கலந்த ஆக்ஷன் த்ரில்லர் படமாக வெளியாகி ரசிகர்கள் மத்தியில் அமோக வரவேற்பை 'துப்பறிவாளன்' திரைப்படம் பெற்றிருந்தது. படத்தில் கணியன் பூங்குன்றன் என்ற கேரக்டரில் டிடெக்டிவாக நடித்திருப்பார் நடிகர் விஷால். படத்தை விஷால் ஃபிலிம் ஃபேக்டரி நிறுவனம் தயாரித்திருந்த நிலையில், மிஷ்கின் இயக்கியிருந்தார்.